दक्षिण कोरियामा कोरोनाले ज्यान गुमाउने ९८ प्रतिशत पाको उमेर र दीर्घ रोगी

सोल-दक्षिण कोरियामा कोरोना संक्रमणका कारण ज्यान गुमाउने अधिकांशमा पहिलेबाट नै कुनै न कुन‌ै प्रकारको दीर्घ रोग रहेको कोरियाली रोग तथा प्रकोप नियन्त्रण केन्द्रले बताएको छ ।

दक्षिण कोरियामा अप्रिल मसान्त सम्ममा २४७ जनाले ज्यान गुमाईसकेको बताउदै ति मध्ये ९८.८ प्रतिशत मृतक पहिलेबाट नै कुनै न कुनै रोगबाट ग्रस्त रहेको केन्द्रले जनाएको छ ।

ज्यान गुमाउने मध्ये कार्डियाक इन्फेक्सन, कार्डियाक इनसफिसियन्सी लगायतका रोगबाट सबै भन्दा बढी करिव ७६.९ प्रतिशत अर्थात १ सय ९० जना मानिस ग्रसित थिए ।

त्यसै गरि मोटोपनाबाट करिव ४९.४ प्रतिशत अर्थात १ सय २२ जना मानिस ग्रस्त रहेका थिए भने मानसिक रोगबाट ४९.४ प्रतिशत अर्थात १०९ जना मानिस ग्रस्त थिए ।

केन्द्रले दिएको जानकारी अनुसार कोरियामा कोरोना संक्रमणका कारण ज्यान गुमाउनेको औसत आयु ७७.३ बर्ष रहेको छ । ६५ बर्ष भन्दा बढी उमेर समुहका मृतकको संख्या भने ८६.२ प्रतिशत रहेको केन्द्रले जनाएको छ ।

केन्द्रका अनुसार दक्षिण कोरियामा फैलिएको संक्रमणबाट ज्यान गुमाउने मध्ये ७२.५ प्रतिशत अस्पताल तथा भीडभाड युक्त क्षेत्रबाट संक्रमित, १०.५ प्रतिशत सिछन्जी चर्चमा भएको संक्रमण तथा ८.५ प्रतिशत संक्रमित सँगको सम्पर्कबाट संक्रमितहरु रहेका छन् ।

त्यसै गरि मृतकहरु मध्ये ६९.९ प्रतिशत अर्थात १७२ जना डेगुबाट छन्, उत्तरी ग्योङसाङबाट २१.१ प्रतिशत अर्थात ५२ जना, जियोङ्जी बाट ६.१ प्रतिशत अर्थात १५ जना, बुसानमा ३ जना, सोलमा २ जना ग्याङ्वन प्रान्तमा २ जना तथा उल्सानमा १ जनाले ज्यान गुमाएको केन्द्रले जनाएको छ