प्रचण्डलाई गाली गरेको अभियोगमा रेडियो नेपालका बोर्ड सदस्य पाठक पक्राउ

काठमाडौं – नेकपा अध्यक्ष एवं पूर्व प्रधानमन्त्री पुष्पकमल दाहाल (प्रचण्ड)लाई सामाजिक सञ्जालमा गालीगलौच गरेको अभियोगमा पत्रकार दिपक पाठक आज विहान पक्राउ परेका छन् । पाठक रेडियो नेपालको बोर्ड सदस्य समेत हुन ।

प्रहरीको साइबर ब्युरोले विद्युतीय अपराध गरेको आरोपमा झापा घर भएका पाठकलाई पक्राउ गरेको हो ।

केही दिनदेखि लगातार फेसबुकमा प्रचण्डलाई अशिष्ट र अमर्यादित गाली गरको विषयमा उजुरी परेपछि उनलाई प्रहरीले घरैबाट पक्राउ गरेको हो । उनीमाथि साइबर क्राइमको अभियोग छ ।

अध्यक्ष प्रचण्डका तर्फबाट प्रेस सल्लाहकार विष्णु सापकोटाले छानवीन र कारवाहीका लागि प्रेस काउन्सिलमा केही दिन अघि उजुरी दायर गरेका थिए ।

काउन्सिलले छानवीनपछि कारवाहीका लागि सञ्चार तथा सूचना प्रविधि मन्त्रालयमा पत्राचार समेत गरेको थियो ।

मन्त्रालयले पाठकलाई यो विषयमा स्पष्टीकरण समेत सोधेको थियो । काउन्सिलका कार्यबाहक अध्यक्ष किशोर श्रष्ठले पाठकका विरुद्ध उजुरी परेको, आचारसंहिताबारे अध्ययन गरेको जनाउँदै बाँकी कारवाहीका लागि सम्बन्धित निकायमा पठाइएको जानकारी दिए ।