‘बाबुराम भट्टराई लगायतविरुद्ध मुद्दा हाल्ने युवा संघको संस्थागत निर्णय होईन’

काठमाडौं – पूर्वप्रधानमन्त्री डा. बाबुराम भट्टराई, नेतृ हिसिला यमी र विश्वदीप पाण्डेविरुद्ध उजुरी दर्ता गर्ने निर्णय संस्थागत नरहेको राष्ट्रिय युवा संघ नेपालका संयोजक राम प्रसाद सापकोटा (दीपशिखा) ले  प्रष्ट पारेका छन् ।

यस्ता गतिविधिमा संलग्न भए त्यो उसको नीजि विषय भएको र राष्ट्रिय युवा संघ नेपालको संस्थागत निर्णय नभएको उनले बताएका छन् ।
सामाजिक संजाल फेसबुकमार्फत उनले निर्णय र योजना नभएका विषयमा संस्थाको जिम्मेवारी नहुने र संस्थाको नाम नजाेड्न पनि अपिल गरेका छन् ।

संगठनले उजुरी गरेको र नाराबाजी भएको भन्ने खबरहरु संचारमाध्यममा आएको विषयमा आफ्नो गम्भीर ध्यानाकर्षण भएको भन्दै उनले संगठनले हुलहुज्जत गर्ने र नाराबाजी गर्ने काम गर्नै नसक्ने र गर्न पनि नहुने बताएका छन् ।

आफ्नै पार्टी नेतृत्वमा रहेको सरकार र कानुन पालना गर्न सहयोग गर्नुपर्छ भन्ने आफूले ठानेको भन्दै उनले कानुन उलंघन वा त्यस्ता गतिविधि हेर्ने राज्यको आफ्नै निकाय भएकोले त्यसलाई विश्वसनीय बनाउन सहयोग गर्नुपर्नेमा तोड्ने कामप्रति सहमत हुन नसक्ने बताएका छन् ।