अमेरिकी उपराष्ट्रपतिले पनि अनिवार्य नियम तोडे, मास्क नलगाई अस्पताल भ्रमण

एजेन्सी – कोरोनाको संक्रमण नियन्त्रणमा समस्या भैरहेको समयमा अमेरिकी उपराष्ट्रपति माइक पेन्सले पनि अनिवार्य नियम तोडेका छन् । उनले मास्क नलाई अमेरिकाको एक ठूलो अस्पतालको भ्रमण गरेका छन् ।

उपराष्ट्रपति पेन्सले भ्रमण गरेको अस्पतालकै आफ्नै नियममा पनि आगन्तुकहरुले अनिवार्य रुपमा मास्कसहितका व्यक्तिगत सुरक्षात्मक सामग्री लगाउनु पर्ने उल्लेख छ ।

टोलीमा रहेका सबैले मास्क लगाएको भए पनि पेन्सले भने नलगाएका तस्वीरमा प्रष्ट देखिन्छ ।

मायो क्लिनिकले हाल डिलिट गरेको ट्वीटमा आफूहरुले उपराष्ट्रपति पेन्सलाई मास्क लगाउनु पर्ने नियम बारे पहिले नै जानकारी गराएको उल्लेख थियो ।

उपराष्ट्रपति पेन्सले अस्पताल भ्रमण गर्ने आफ्नो निर्णयको बचाउ गरेका छन् । अस्पतालका स्टाफ र बिरामीलाई भेट्नु अनिवार्य भएकाले आफू त्यहाँ गएको उनले उल्लेख गरेका छन् ।

माइक पेन्सले ह्वाइट हाउस कोरोना भाइरस टास्क फोर्सको नेतृत्व सम्हाल्दै आएका छन् । उनले नै कोरोना भाइरसको महामारीको यो समयमा संक्रमणबाट जोगिने उपायका रुपमा रहेको मास्क अस्पताल भ्रमण गर्दा पनि नलाएको देखिएको हो ।