विश्वभर अनिकाल र भोकमरीको जोखिम बढ्यो – संयुक्त राष्ट्रसंघ

एजेन्सी – विश्वभर अनिकाल र भोकमरीको जोखिम बढ्दै गएको संयुक्त राष्ट्रसंघले जनाएको छ । भोकमरीका कारण उत्पन्न हुने गम्भीर दुर्घटना वा विनाशबाट जोगिनका लागि तत्काल उपयुक्त प्रयासको खाँचो रहेको विश्व खाद्य कार्यक्रम (डब्लुएफपी) का प्रमुख डेविड बिज्लेईले बताएका छन् ।

भोकमरीका कारण समस्यामा पर्नेको संख्या विश्वभर १३ करोड ५० लाखबाट बढेर २५ करोड भन्दा बढी पुग्ने आँकलन राष्ट्रसंघले जनाएको छ ।

डब्लुएफपीका अनुसार भोकमरीका कारण सबैभन्दा बढी प्रभावित हुने १० देश छन्, जुन देशमा द्वन्द्व, आर्थिक संकट र जलवायु परिवर्तनको प्रभाव अधिक परेको छ ।

कोरोना भाइरसको महामारी पूर्व पनि पूर्वी अफ्रिका र दक्षिण एसियाका देशहरुले खाद्यान्न अभावको गम्भीर संकट भोगेका थिए ।

संयुक्त राष्ट्रसंघीय सुरक्षा परिषदको भिडियो कन्फ्रेन्स मार्फत भएको बैठकमा सम्बोधन गर्दै डब्लुएफपीका प्रमुख डेविडले सम्भावित गम्भीर अनिकाल विरुद्ध विश्वले अति तीव्र तर बुद्धिमतापूर्ण ढंगले काम गर्नु पर्ने बताएका छन् ।