रामेछापमा बस दुर्घटना, बसमा झण्डै ३० जना थिए

रामेछाप — रामेछापको मन्थली नगरपालिकामा पर्ने कुनाउरीमा बुधबार बिहान यात्रुवाहक बस दुर्घटना भएको छ । पूर्व अरनिको यातायात समितिको बा २ ख ६८१८ नम्बरको बस ब्रेक फेल भएर दुर्घटना हुँदा २८ जना घाईते भएका छन् ।
घाइतेमध्ये २ जनाको अवस्था गम्भीर छ ।

काठमाडौंबाट यात्रु लिएर दोलखाको मालुखोला जान लागेको गाडी दुर्घटनामा परेको जिल्ला प्रहरी कार्यालय रामेछापले जनाएको छ । गम्भिर घाईते भएका २ जनालाई उपचारका लागि काठमाडौं पठाउने तयारी भैरहेको छ ।

लकडाउनमा काठमाडौंमा अलपत्र परेका नागरिकहरुलाई स्थानीय सरकारले बसको व्यवस्था गरी गाउँ फर्काउन थालेका छन् । त्यहि अलपत्र यात्रु बोकेर गएको बस दुर्घटनामा परेको हो ।