लकडाउनमा ग्याँसमा कालोबजारी गर्नेलाई ३ लाख जरिवाना

धनगढी – महंगोमा खाना पकाउने एलपी ग्यास बिक्री गर्दै आएका धनगढीका एक ग्यास सप्लायर्सलाई तीन लाख रुपैयाँ जरिवाना गरिएको छ ।लकडाउनको मौका छोपेर धनगढी उपमहानगरपालिका–६, मटियारीस्थित कुमारी हेमन्ती पालद्वारा सञ्चालित शुभ समैजी ग्यास सप्लायर्सलाई कालोबजारी गरेको अभियोगमा तीन लाख रुपैयाँ जरिवाना गरेको हो ।

सप्लायर्सले २०७६ चैत १ देखि २०७७ वैशाख ७ गतेसम्म बिना बिल महंगो मूल्यमा ग्यास बिक्री गर्दै आएको वाणिज्य आपूर्ति तथा उपभोक्ता संरक्षण कार्यालय धनगढीका प्रमुख कमल पुनले बताए ।

पुनका अनुसार सप्लायर्सले एक हजार एक सय ४४ थान ग्यास सिलिण्डर बिना बिल बिजक उपभोक्तालाई बिक्री वितरण गर्दै आएको भेटिएको छ ।

जिल्ला प्रशासन कार्यालया, जिल्ला प्रहरी कार्यालय, वाणिज्य आपूर्ति तथा उपभोक्ता संरक्षण कार्यालय र धनगढी उपमहानगरपालिका र प्रहरीको संयुक्त टोलीले ग्यासको डिलरमा छापा मारेको थियो ।