दिल्लीमा २ बर्षको बालकलाई कोरोना संक्रमण- आमा ८ महिनाकी गर्भवती

नयाँ दिल्ली– भारतको राजधानी नयाँ दिल्ली स्थित दिल्ली क्यान्सर अस्पताललाई कोरोना विषेश अस्पताल बनाइए यता सबै भन्दा कम उमेरका बालकमा कोरोना संक्रमण पाइएको छ । अधिकारीहरुका अनुसार २ बर्षका बालकमा सो संक्रमण पाइएको हो ।

श्रोतका अनुसार सोही अस्पतालमा कार्यरत एक नर्सका २ बर्षका छोरामा सो संक्रमण पाइएको हो । ती नर्स हाल ८ महिनाकी गर्भवती समेत रहेकी छन् । ती वालकमा संक्रमण पाइए पश्चात उनको परिवारका अन्य सदस्यहरुको पनि स्वास्थ्य परिक्षण गरिएको छ ।

उक्त अस्पतालमा कार्यरत २३ स्वास्थ्यकर्मीहरुमा कोरोना संक्रमण पाइएको छ । संक्रमितहरु मध्ये ३ जना डाक्टर, नर्स तथा सरसफाई कर्मचारी रहेको पनि जानकारी पाइएको छ । हाल सो अस्पताल बन्द गरिएको छ ।

बेलायतबाट फर्केका आफ्ना नातेदार भेटेर फर्किएका एक डाक्टरबाट सो अस्पतालमा कोरोना संक्रमण फैलिएको पनि समाचारमा जनाइएको छ । हाल सो अस्पतालमा कार्यरत ५० भन्दा बढीलाई क्वारेन्टाइनमा राखिएको छ ।

कोरोना संक्रमणका कारण दिल्लीमा ३० जनाको मृत्यु भइसकेको छ भने १५६१ जना संक्रमित भएका छन् । विगत २४ घण्टामा दिल्लीमा ५१ जना नयाँ संक्रमित थपिएका छन् ।