कोरियामा कोरोना त्राससंगै संसदीय निर्वाचन

सोल-दक्षिण कोरियामा कोरोना संक्रमणको त्रासका विचमा नै संसदीय निर्वाचन हुने भएको छ । अप्रिल १५ मा हुने निर्वाचनको सम्पूर्ण तयारी पूरा भएको कोरियाली निर्वाचन आयोगले जनाएको छ ।

यसैविच निर्वाचन आयोगले सेल्फ आइसोलेशनमा बसेका व्यक्तिहरुलाई पनि निश्चित प्रकृया पुर्याएर निर्वाचनमा सहभागी गराउने भएको छ ।

निर्वाचन आयोगका अनुसार अप्रिल १ देखि १४ सम्म सेल्फ आइसोलेशनमा बसेका तर कोरोना संक्रमण नभएका मानिसहरुलाई आउदै गरेको संसदीय चुनावमा मतदान गर्न दिइन लागेको हो ।

कोरियाका स्वास्थ्य मन्त्री पार्क नियोङ हुका अनुसार ती व्यक्तिहरुलाई मास्कको प्रयोग गरेर पैदल अथवा निजी सवारी साधन प्रयोग गरि मतदान गर्न गएमा भोट हाल्न दिइने छ । उनीहरुलाई सार्वजनिक सवारी साधनको प्रयोगमा भने प्रतिवन्ध लगाइने छ ।

गत शुक्रवार र शनिवार भएका प्रारम्भिक निर्वाचनहरुमा भाग लिन नपाए पनि बुधवार हुने चुनावमा भने उनीहरुले आयोगको आचार संहिता पूरा गरेर मतदान गर्न पाउने छन् ।

कोरियाको स्वास्थ्य मन्त्रालयका अनुसार ती आइसोलेशनमा बसेकाहरुलाई स्वास्थ्यकर्मीहरुको प्रत्यक्ष निगारानीमा मतदान स्थलसम्म ल्याइने छ भने स्वास्थ्य परिक्षण पश्चात मात्र मतदान स्थलमा प्रवेश गराइने छ ।