जापानको नारिता विमानस्थलले ‘रन वे’ बन्द गर्ने

टोकियो- विश्वभर आतंक मच्चाइरहेको कोरोना भाइरसको संक्रमणको जोखिमलाई मध्यनजर गर्दै जापानमा रहेका विभिन्न निकायले सो संक्रमण रोक्न आ-आफ्नो क्षेत्रबाट सके जति प्रयास गरिरहेका छन् ।

सोही प्रयासलाई सघाउन जापानको नारिता अन्तराष्ट्रिय विमानस्थलले आफ्नो सेवामा कटौति गरेको छ । २ वटा रनवे भएको सो विमानस्थलले अब एउटा रनवे बाट मात्र सेवा सञ्चालन गर्ने भएको छ ।

हाल विमानस्थलमा हुने गरेका उडानहरुमा ८० प्रतिशत सम्म कटौति भएका कारण २५०० मिटर लामो सो रन वे ‘बी’लाई भोलिबाट अर्को सुचना नआएसम्मका लागि बन्द गरिन लागिएको विमानस्थल प्रशाशनले जनाएको छ । तर ४००० मिटर लामो रन वे ‘ए’ भने सञ्चालनमा नै रहने विमानस्थलले जनाएको छ ।

विमानस्थल प्रशासनका अनुसार सन् १९७८ मा सञ्चालनमा आए यता यो नै पहिलो घटना हो जसमा विमानस्थलको रन वे नै बन्द गरिएको हो ।

यसका अलावा जापानका अन्य विमानस्थलहरुले पनि आफ्नो सेवालाई घटाउदै आएका छन् ।

हानेडा विमानस्थलले पनि गत मार्च महिनाबाट मात्र टोकियो ओलम्पिकका लागि भनेर ५७२ मिलियन अमेरिकी डलर खर्चेर बनाएको टर्मिनल २ बन्द गर्ने बताएको छ । सो टर्मिनल आन्तरिक विमान सञ्चालनका लागि प्रयोग गरिन थालिएको थियो ।