लकडाउनमा पनि लुकिछिपी नेपाल पस्दै भारतीय

काठमाडौं – विश्वभर महामारीका रूपमा फैलिएको कोरोना भाइरस संक्रमणको जोखिमका कारण अहिले नेपाल ‘लकडाउन’ मा छ । नेपाल–भारत सीमा पनि बन्द गरिएको छ । भारततर्फ पनि ‘लकडाउन’ छ ।

नेपाल–भारत सरकारले नेपालमा रहेका भारतीय र भारतमा रहेका नेपालीको उचित व्यवस्थापन गर्ने सहमति गरेका छन् । सीमा बन्द भएका कारण आवतजावत रोकिएको छ । तर, खुला सीमा भएको भारतबाट विभिन्न बहानामा अझै पनि भारतीय नागरिक नेपाल भित्रिइरहेका छन् ।

दक्षिण झापाको विभिन्न खुला सीमाबाट भारतीय नागरिक लुकेर नेपाल प्रवेश गर्ने गरेका छन् । खासगरी सीमा क्षेत्रमा नेपालतिर खेती गर्न भन्दै भारतीय प्रवेश गर्ने गरेका छन् ।

गौरीगन्ज गाउँपालिका–१ स्थित महाभारा, झोडालगायत क्षेत्रमा मात्र दुई बिघा बढी नेपालतर्फको खेती भारतीयले गर्छन् । नेपाल प्रवेशमा रोक लगाइएको समयमा पनि उनीहरू ओहोरदोहोर गरिरहेको स्थानीयको भनाइ छ ।

मेची खोलाका कारण टापुजस्तै बनेको भारतको किसनगन्ज जिल्लाका जनता, पल्सा, डाकुपाडालगायत क्षेत्रका कृषक खेती गर्न नेपाल आउने गरेका हुन् ।

त्यहाँका करिब १५० परिवारले दुई सय बिघाभन्दा बढी नेपाली जमिनमा खेती गर्दै आएको गौरीगन्ज–१ का वडाध्यक्ष कार्तिकलाल राजवंशीले बताए । नयाँपत्रिका दैनिकबाट