राष्ट्रपति भण्डारीको सम्बोधन- ‘सरकारले प्रभावकारी कदम चालेकै कारण नेपालमा कोरोना न्यून’

काठमाडौँ-राष्ट्रपति विद्यादेवी भण्डारीले सरकारले प्रभावकारी कदम चालेकै कारण नेपालमा कोरोनाको संक्रमण भयावह नभएको बताएकी छिन ।

देशवासीको नाममा सम्बोधन गर्दै राष्ट्रपति भण्डारीले नेपाल सरकारले अहिले गरिरकेको गृहकार्यलाई विश्वले प्रशंसा गरिरहेको पनि बताईन् । उनले सरकारले घोषणा गरेको लकडाउनमना सक्दो सहयोग गर्न र घरभित्रै बसिदिन आग्रह गरेकी छिन् ।

आफ्नै घरमा बसेर सामाजिक दुरी कायम गरे रोगसँग लड्न सकिने र संक्रमण फैलिएर भयावह अवस्था आउन नपाउने उनको भनाई थियो । यस्तै लकडाउनको समयमा दैनिक ज्यालादारीमा काम गर्ने कामदारहरु अलि धेरै प्रभावित भैरहेको भन्दै त्यस्ता वर्गका लागि सरकारले विभिन्न राहत प्याकेजको घोषणा गरेको बताएकी छिन् ।

कोरोना भाईरसले निम्त्याएको लकडाउनले नेपालको मात्रै नभई विश्वकै अर्थतन्त्रमा प्रभाव परेको भन्दै उनले लकडाउनको यो परिस्थितिपछि सरकारले आवश्यक कदम अघि बढाउने दाबी गरिन् । उनले विभिन्न देशमा रहेका नेपालीलाई जहाँ जस्तो अवस्थामा छ त्यस्तै अवस्थामा सुरक्षित भएर बस्न पनि आग्रह गरेकी छिन् ।

यस्तै नेपाललाई विभिन्न देशले प्रदान गरेको सहयोग र देखाएको तत्परताप्रतिपनि उनले धन्यवाद दिएकी छिन् । संक्रमित विरामीको उपचारका लागि सरकार पुरै तयारी अवस्थामा रहेको भन्दै उनले अहोरात्र खटिरहने सबै निकायलाई धन्यवाद दिएकी छिन् । डाक्टर, नर्स र समग्र स्वास्थ्यकर्मीको धैर्यताको उच्च सम्मान गर्दै उनले यो लडाईमा मानव जातीले छिट्टै जित्ने बताएकी छिन् ।

यो परिस्थितिमा राजनीतिक दल, उद्योग, व्यापारी, स्वायंसेवी लगायत संस्थाहरुलाई आफूले सकेको सहयोग गर्न पनि उनले आग्रह गरेकी छिन् ।