विश्व शेयर बजारमा ३३ वर्ष यताकै ठूलो धक्का

एजेन्सी – कोरोना भाइरसको प्रभाव विश्व शेयर बजारमा परेको छ । शेयर बजारमा यो वर्षको पहिलो तीन महिनामा पछिल्लो ३३ वर्ष यताकै सबैभन्दा धेरै नोक्सानी भएको देखिएको छ ।

द डाउ जोन्स इन्डस्ट्रियल एभरेज र लण्डनको एफटिएसइ १०० शेयर बजारमा पछिल्लो ३३ वर्ष अर्थात सन् १९८७ यताकै सबैभन्दा धेरै नोक्सानी भएको छ । 

यी बजारमा यो वर्षको पहिलो त्रैमासिकमा क्रमशः २३ र २५ प्रतिशत नोक्सानी भएको हो ।

द एस एण्ड पी ५०० शेयर बजारमा पहिलो त्रैमासिकमा २० प्रतिशतको नोक्सानी भएको छ । यो सन् २००८ यताकै सबैभन्दा खराब अवस्था हो ।

विश्वका विभिन्न देशमा कोरोना भाइरसको संक्रमण फैलिन नदिनका लागि सरकारले लकडाउन तथा सेल्फ आइसोलेसनका उपायहरु अपनाएका कारण बजार प्रभावित भएको हो ।