कोरोनाले ज्यान गए १० लाख रुपैयाँ

ललितपुर-ललितपुरको गोदावरी नगरपालिकाले नगरक्षेत्रमा खटिने सुरक्षाकर्मी र कर्मचारीको कोरोना भाईरसका कारण ज्यान गएमा परिवारलाई १० लाख रुपैयाँ उपलब्ध गराउने भएको छ ।

कोरोना भाईरस (कोभिड १९) को रोकथाम, उपचार र जनचेतना फैल्याउने काममा खटिने क्रममा संक्रमण भएर ज्यान गए राहत स्वरुप परिवारलाई १० लाख रुपैयाँ उपलब्ध गराउने नगरपालिकाले निर्णय गरेको हो ।

यस्तै नगरपालिकाले कोरोना भाईरसको संक्रमण भएमा निःशुल्क उपचार गरिदिने निर्णय पनि गरेको छ ।

नगरपालिकाले लकडाउनको अवधिभर स्वास्थ्यचौकीमा ड्युटीमा खटिने स्वास्थ्यकर्मीका लागि हरेक स्वास्थ्यचौकीलाई १ महिनामा २५ लिटर ईन्धन र हरेक दिन प्रतिव्यक्ति ५ सय रुपैयाँ भत्ता पनि उपलब्ध गराउने भएको छ ।

यस्तै कोरोनाबाट हुने जोखिम कम गर्न आवश्यक कामका लागि प्रति वडा २ लाख रुपैयाँ विपत व्यवस्थापन कोषमा जम्मा गर्ने निर्णय पनि भएको नगरपालिकाका प्रमुख गजेन्द्र महर्जनले जानकारी दिए ।

लकडाउनको अवधिभर नगरपालिकाभित्रका कोही व्यक्ति विरामी भएमा नगरपालिकाभित्रका एम्बुलेन्स मार्फत उपचार गर्न स्वास्थ्य चौकी अथवा अस्पताल जानुपरेमा नगरपालिकाले लाग्ने शुल्कमा १ हजार रुपैयाँ छुट गर्ने व्यवस्था पनि गरेको छ ।