महाबीर पुनको जवाफ ‘पीपीइ के हो? कस्तो हुन्छ ? भन्ने थाहा पाएको पाँच दिन भयो, बुझ्नु भो ?’

काठमाडौँ-राष्ट्रिय आविष्कार केन्द्रका अध्यक्ष डा महाबीर पुनले आफ्नो प्रयासमा उत्पादन भैरहेको ‘पीपीइ’ बारे प्रश्न उठाउने चिकित्सकलाई जवाफ दिएका छन् |

उनले सामाजिक संजालमा स्टाटस लेख्दै पीपीई उत्पादन गरेको ‘डाक्टर नभएको बेला झाँक्रीले उपचार गरेको’ उपमा दिएका हुन् |

कोरोना भाइरस संक्रमितको उपचारमा संलग्न चिकित्सकले प्रयोग गर्ने गाउन (पीपीइ) उत्पादन शुरु गर्नु अघि डा. भगवान कोइराला परामर्श भएको भन्दै पुनले पीपीई अभावमा चिकित्सकहरु त्रसित रहेको अवस्थामा सहयोग गर्ने उद्धेश्यले उत्पादन शुरु गरिएको उल्लेख गरे |

उनले प्रश्न गरेका छन् , ‘खेलाँची नगरौं भन्ने र कोरोना भाइरसको विषयमा सामाजिक सञ्जाल र सञ्चार माध्यमबाट सचेतना जगाइरहेका डा. रवीन्द्र समिर सहित स्वास्थ्य मन्त्रालय र अन्य जान्नेसुन्ने विद्वानहरुले के हेरेर बस्नु भएको थियो अहिलेसम्म ?’

आविष्कार केन्द्रको पहलमा  पीपीई उत्पादन शुरु भएपछि एक जना चिकित्सकले पीपीईको गुणस्तरबारे प्रश्न औंल्याए पछि पुनले यसको जवाफ दिएका हुन् |

डा रबिन्द्र समीरले एक अनलाइनलाई अन्तर्वार्ता दिंदै पीपीई उत्पादन गर्ने प्रविधि र जनशक्ति नभएको बताउदै मापदण्ड नपुगेको पीपीई बनाएर प्रयोगमा ल्याउँदा स्वास्थ्यकर्मीहरुलाई संक्रमणको जोखिम हुनसक्ने औंल्याएका थिए |

आविष्कार केन्द्रले उत्पादन गरिरहेको पीपीई सकेसम्म र जानेसम्म गुणस्तरीय बनाउने बताउदै पुनले सित्तैमा वितरण गरिने जनाए |

राष्ट्रिय आविष्कार केन्द्रका संस्थापक समेत रहेका पुनको प्रयासलाई सहयोग र सरहाना गर्नुको सट्टा आलोचना गरिएपछि पुनले जंगिदै जवाफ दिएका छन – ‘पीपीइ भन्ने चिज के हो, कस्तो हुन्छ भन्ने कुरा थाहा पाएको आज पांच दिन मात्र भयो कुरा बुझ्नु भो ?’