लकडाउनको पाँचौ दिनः आजदेखि न्यूनतम पूर्वाधार सञ्चालनमा

काठमाडौं – आजदेखि न्युनतम पूर्वाधार संचालनमा आउने भएको छ । उपप्रधानमन्त्री तथा रक्षामन्त्री ईश्वर पोखरेलको संयोजकत्वमा गठित उच्चस्तरीय समन्वय समितिको शुक्रबारको बैठकले आज शनिबारदेखि न्यूनतम आवागमन खुल्ला गर्ने निर्णय गरेको हो ।

समितिको निर्णय अनुसार आजदेखि दैनिक उपभोग्य वस्तुको उत्पादन, ढुवानी र वितरणसँगै ग्राहकको आवागमन रोकिने छैन ।

नागरिकलाई संयमित भएर, केही दूरी कायम गरेर, भीडभाड नगरी आफ्नो स्वास्थ्य सुरक्षा ख्याल गरेर मात्रै किनमेल गर्न सरकारको आग्रह छ ।

समितिको यो निर्णयसँगै मुलुकका विभिन्न स्थानमा रोकिएका विदेशी पर्यटकलाई सडक र हवाई मार्गबाट उद्धार गरेर काठमाडौं ल्याइनेछ ।

यस्तै केही श्रमिक उद्योग एवं कारखाना बन्द भएपछि मुलुकभित्रै अप्ठेरोमा परेका श्रमिकलाई सुरक्षित ढङ्गबाट गन्तव्यसम्म पुर्‍याउन पनि निर्देशन दिने निर्णय गरिएको सरकारका प्रवक्ता एवं अर्थमन्त्री डा।युवराज खतिवडाले बताए ।