जर्मनीमा २ भन्दा बढी व्यक्ति भेला हुन नपाउने, अमेरिकामा स्वास्थ्य सामग्री १० दिनलाई मात्रै पुग्ने

एजेन्सी – कोरोना भाईरस अर्थात कोभिड १९ को सङ्क्रमण बढ्दै गएपछि जर्मनीले दुई जना भन्दा बढी व्यक्ति भेला हुन प्रतिबन्ध लगाएको छ ।

सङ्क्रमणको दरलाई सुस्त बनाउन मानिसको व्यवहार नै सबैभन्दा प्रभावकारी उपाय भएकोले व्यक्तिबीचको दूरी कायम गर्न सबैलाई आग्रह गर्दै चान्स्लर एन्जेला मर्केलले दुई जना भन्दा धेरै व्यक्ति भेला हुन प्रतिबन्ध लगाएका अन्तर्राष्ट्रिय संचार माध्यमले जनाएको छ ।

यस्तै अमेरिकाको न्यूयोर्कमा भेन्टिलेटर लगायत अत्यावश्यक स्वास्थ्य सामाग्री अब १० दिनलाई मात्र पुग्ने चेतावनी दिइएको छ । आफूहरु ठूलो अभावको १० दिन मात्रै नजिक रहेको भन्दै न्यूयोर्कका मेयर बिल डि ब्लासियोले तत्काल व्यवस्था नभए मानिसहरु सेवा नपाएर ज्यान गुमाउने अवस्था पुग्ने बताए ।

कोरोना सङ्क्रमण बढ्दै गएपछि अस्ट्रेलियाले सिनेमाघर, पुजास्थल लगायत बन्द गराएको छ । बेलायतका प्रधानमन्त्री बोरिस जोनसनले व्यक्तिगत दूरी कायम नगरे कडा प्रतिबन्ध लगाउने चेतावनी दिएका छन् ।