ठमेलका अधिकांश होटल रेष्टुरेन्टका कर्मचारीलाई बेतलबी घर पठाउन थालियो

काठमाडौं – मुख्य पर्यटकीय केन्द्र ठमेलका अघिकांश होटल व्यवसायीले कर्मचारीलाई अनिश्चितकालको लागि बेतलबी बिदा दिएर घर पठाउन थालेका छन् ।

सबै देशबाट नेपाल आउन बन्द गरेपछि ठमेलका होटलले कर्मचारीलाई बेतलबी बिदामा घर पठाउन थालेका हुन् । अहिले अधिकांश रात्रि व्यवसायहरु बन्द भएकोले कर्मचारीलाई विदा दिन थालिएको ठमेल विकास परिषद्का अध्यक्ष प्रकाश नरसिंह राणाले बताए ।

अहिले ठमेल क्षेत्रभित्र मात्रै साना–ठूला गरेर ४ हजार जति होटलहरु छन् । त्यसमा प्रत्यक्ष र अप्रत्यक्ष रुपमा ३० हजार कर्मचारीहरु छन् । राणाका अनुसार विभिन्न होटल व्यवसायीले होटलमा रहेका ८० देखि ९० प्रतिशत कर्मचारीहरुलाई घर पठाएका छन् । सुरक्षा, हाउसकिपिङ र पाकशालाका एकाध कर्मचारीबाहेक अधिकांश होटलले सबै कर्मचारीहरुलाई बिदा दिएका हुन् ।