साझा स्वास्थ्य सेवामा मास्क किन्नेको लाइन

काठमाडौं – महाराजगञ्जस्थित साझा स्वास्थ्य सेवा सहकारी संस्थामा मास्क किन्ने सर्वसाधारणको भिड लागेको छ । कालोबजारी गर्ने व्यापारीबाट बरामद भएको मास्क सरकारले साझा स्वास्थ्य सेवाबाट वितरण गरेपछि मास्क किन्नेको भिड लागेको हो ।

बुधबार कोरोना भाइरस (कोभिड–१९) संक्रमण, रोकथाम तथा नियन्त्रण उच्चस्तरीय समन्वय समितिको बैठकले अवैध रुपमा लुकाइ राखिएको अवस्थामा बरामद भएका मास्कमध्ये ५ लाख स्वास्थ्य तथा जनसंख्या मन्त्रालयलाई दिने र बाँकी साझा स्वास्थ्य सेवा सहकारी संस्था लिमिटेडमार्फत ब्रिकी गर्ने निर्णय गरेको थियो ।

सरकारले काठमाडौं उपत्यकाका विभिन्न ठाउँमा अवैध रुपमा लुकाइ राखेका मास्क बरामद गरेको थियो । बुधबार मात्रै काठमाडौंको सानो भर्‍याङबाट १० लाख थान मास्क बरामद गरेको थियो । त्यसअघि पनि राजधानीका विभिन्न दुई स्थानबाट १० लाख भन्दा बढी मास्क बरामद भएको थियो ।