कोरियाली सैन्यहरुमा विगत ८ दिनबाट कोरोना पाइएन

सोल-दक्षिण कोरियाली रक्षा मन्त्रालयका अनुसार पछिल्ला ८ दिनमा दक्षिण कोरियाली सुरक्षा कर्मीहरुमा एक जना पनि कोरोना संक्रमणका विरामीहरु थपिएका छैनन् ।

मन्त्रालयका अनुसार हालसम्म दक्षिण कोरियामा ३७ जना सुरक्षा दस्ताका अधिकारीहरु कोरोना संक्रमित भएका थिए ।

संक्रमित हुनेहरुमा १० जना कोरियाली सैनिक, ४ जना वायु सेनाका अधिकारी तथा अन्य सुरक्षा निकाय सँग सम्बन्धित व्यक्तिहरु रहेको मन्त्रालयले जनाएको छ । यता मन्त्रालये सबै संक्रमितहरु उपचार पश्चात स्वस्थ रहेको पनि जनाएको छ ।

कुल संक्रमितहरु मध्ये २१ जना कोरियाली सैनिक, १३ जना कोरियाली वायु सेना, २ जना कोरियाली जल सेना तथा तथा एक सम्पर्क कक्षका अधिकारी रहेको कोरियाली रक्षा मन्त्रालयले बताएको छ ।

मन्त्रालयका अनुसार हाल २२०० जना कोरियाली सैन्य अधिकारीहरुलाई क्वारेन्टाइनमा राखिएको छ जसमा २२ जना थेगु लगायतका प्रभावित क्षेत्रको भ्रमण तथा ती क्षेत्रका मानिसहरु सँग प्रत्यक्ष सम्पर्कमा आएका थिए । उनीहरुमा कोरोना संक्रमणको लक्षण देखिएता पनि परिक्षणमा भने नेगेटिभ देखिएको मन्त्रालय श्रोतले जनाएको छ ।

मन्त्रालयका अनुसार विगत ८ दिन यता कुनै पनि सैन्य अधिकारीहरुलाई कोरोना संक्रमण भएको पाइएको छैन । यता सरकारले कोरोना नियन्त्रणका लागि भन्दै देशका विभिन्न स्थानहरुमा आफ्ना ३२७८ जना सैनिक तथा ४५३ जना स्वास्थ्य विज्ञहरुलाई परिचालन गरेको छ ।