१७५ वटा बोरामा लुकाएर राखिएको ६ लाख थान सर्जिकल मास्क बरामद

काठमाडौं – काठमाडौंको चन्द्रागिरि नगरपालिका–१० विष्णुदेवीस्थित एक गोदाममा को ६ लाख थान सर्जिकल मास्क लुकाएर राखेको अवस्थामा भेटिएको छ । राखिएका मास्क प्रहरीले बरामद गरेको हो ।

यसअघि कपनबाट १ लाख ६८ हजार थान र डल्लुबाट ७८ हजार थान मास्क बरामद भएको थियो । शनिबारयता काठमाडौंबाट आठ लाख ४० हजार थान मास्क प्रहरीले बरामद गरिसकेको छ ।

सतुंगलका रोहित श्रेष्ठको घरको गोदाममा लुकाएर राखिएको मास्क भेटिएपछि स्थानीय प्रशासनले सिलबन्दी गरेको थियो । १७५ वटा बोरामा ६ लाख बढी मास्क रहेको थाहा भएको प्रहरीले जनाएको छ ।

यसअघि प्रहरीले कपनको मिलन चोकबाट एक लाख ६८ हजार थान मास्कसहित ६ जनालाई पक्राउ गरेको थियो । पक्राउ पर्नेमा एक जना भारतीय नागरिकसमेत छन् ।

कालोबजारी गर्नेहरुले ती सामान लुकाएर कृत्रिम अभाव सिर्जना गरेको अनुसन्धानमा संलग्न अधिकारीहरुले बताएका छन् । नेपालमा पनि कोरोना भाइरस संक्रमणको त्रास बढेसँगै बजारमा मास्क र सेनिटाइजरको अभाव भएको छ ।