नेप्से परिसुचक ४.६६ प्रतिशतले घट्यो

काठमाडौं – नेप्से परिसुचक आज ६४ अंकभन्दा धेरैले घटेको छ । कारोबार हुने हप्ताको पहिलो दिन आज नेप्से परिसुचक ६४ दशमलव १४ अंक अर्थात ४ दशमलव ६६ प्रतिशतले घटेको नेपाल स्टक एक्सचेन्ज लिमिटेडले जनाएको छ । ‘क’ वर्गका कम्पनी मापक सेन्सेटिभ ईन्डेक्स पनि आज १२ दशमल व८८ अंक अर्थात ४ दशमलव ३६ अंकले घटेको छ ।

आज सबै समूहको उप–सुचक घटेका छन् । सबैभन्दा धेरै जीवन बीमा समूहको उप–सुचक ६२१ दशमलव ८८ अंकले घटेको हो । आज दिनभर १७४ कम्पनीको कारोबारमा २ अर्ब १० करोड रुपैयाँका ५५ लाख ७० हजार कित्ता शेयर किनबेच भएका छन् ।

नेपाल लाईफ ईन्स्योरेन्स कम्पनीको आज सबैभन्दा धेरै १७ करोड ३६ लाख रुपैंयाँको सेयर कारोबार भएको छ । यस्तै एनआईसी एसिया बैंक लिमिटेडको ११ करोड ४६ लाख रुपैयाँ र एनएमबी बैंक लिमिटेडको १० करोड ५६ लाख रुपैयाँको सेयर कारोबार भएको छ ।

बजार घटेसँगै सामूदायीक लघुवित्त वित्तिय संस्था लिमिटेड, हिमालय जनरल ईन्स्योरेन्स कम्पनी लिमिटेड, मिथिला लघुवित्त वित्तिय संस्था लिमिटेड लगायत ८ वटा कम्पनीका सेयर लगानीकर्ताले १० प्रतिशतको हाराहारीमा गुमाएका छन् । बजार घट्दा पनि युनाईटेड मोदी हाईड्रोपावर लिमिटेड, सिन्धु विकास बैंक लिमिटेड र ओमी माईक्रोफाईनान्स वित्तिय संस्था लिमिटेडका शेयर लगानीकर्ताले भने सामान्य कमाएका छन् ।

आजदेखि कारोबार समय १ घण्टा थप

नेपाल स्टक एक्सचेन्जले आजदेखि शेयर कारोबारको समय एक घण्टा थपेको छ । नेप्सेले बजारको माग, अन्तर्राष्ट्रिय प्रचलन र लगानीकर्ताको हितलाई ध्यानमा राखेर कारोबारको समय बढाएको नेपाल स्टक एक्सचेन्ज लिमिटेडले जनाएको छ । बिहान ११ बजेदेखि ३ बजेसम्म कारोबार हुँदै आएको बोलकबोल र निरन्तर कारोबार समयलाई १ घण्टा थप गरी ४ बजेसम्म गर्ने व्यवस्था गरेको होे ।

नेप्सेका महाप्रवन्धक चन्द्रसिंह साउदले कारोेबार समय परिक्षणकोे रुपमा थपिएको र यसले बजारमा पार्ने असरको आधारमा फेरि परिमार्जन गर्न सकिने बताएका छन् । महाप्रवन्धक साउदले नेप्सेको कारोेबार समय बढ््दा बजारमा सकारात्मक फाइदा पुग्ने दावी समेत गरेका छन् ।

उनले समय बढाउँदा कारोबार रकम अझ बढ््न सक्ने अपेक्षा गरिएको बताए । तर कारोबार समय थप हुँदा बजारमा इण्डेक्स बढ््छ या घट्छ भन्ने प्रतिकृया दिन नहुने र कसैले दिए विश्वास नगर्न पनि आग्रह गरे ।