फ्रान्स र स्पेनमा पनि आपतकालिन प्रतिवन्धको घोषणा

एजेन्सी – फ्रान्स र स्पेनले पनि कोरोनाभाइरसको फैलावट रोक्न आपतकालीन प्रतिवन्धको घोषणा गरेका छन् ।

युरोपेली देश इटालीले यसअघि नै आपतकालीन प्रतिबन्धको घोषणा गरेका छन् ।

६ करोड ३५ लाख जनसंख्या रहेको फ्रान्समा अत्यावश्यक बाहेकका सबै सार्वजनिक स्थल बन्द गर्न आदेश दिइएको छ ।

विद्यालयहरु अर्को सूचना जारी नभएसम्मका लागि बन्द गरिएको छ । प्रधानमन्त्री एडुअर्ड फिलिपले फ्रान्समा कोरोना संक्रमितको संख्या बढिरहेको र जनताले सूचनाहरु बेवास्ता गरिरहेको बताए ।

उनले दुई शहरबीचको आवतजवात कम गर्न आग्रह गरे । फ्रान्समा कोरोना संक्रमितको संंख्या ४५ सय र मृत्यु हुनेको संख्या ७९ पुगेको छ ।

यस्तै ४ करोड ६७ लाख जनसंख्या रहेको स्पेनले पनि आपतकालीन अवस्थामा बाहेक भ्रमण गर्न तथा सार्वजनिक भेला गर्न रोक लगाएको छ । शैक्षिक संस्थाहरु बन्द छन् ।

इटाली पछि स्पेन युरोपमा सबैभन्दा बढी कोरोना प्रभावित मुलुक हो । स्पेनमा १ सय ९१ जनाको मृत्यु भएको छ भने ६ हजार ४६ जना संक्रमित छन् ।

शुक्रवार मात्र विश्व स्वास्थ्य संगठनले युरोप कोरोना महामारीको केन्द्रबिन्दु बनेको बताएको थियो ।

यता अमेरिकी राष्ट्रपति डोनाल्ड ट्रम्पको कोरोना भाइरसको परीक्षण नेगेभिट आएको ह्वाइट हाउसले जनाएको छ ।