ब्लड प्रेसरका बिरामीलाई कोरोना भाइरसको जोखिम उच्च

काठमाडौं-चीनमा कोरोना संक्रमितको उपचारमा खटिएका एक चिकित्सकका अनुसार कोरोना संक्रमणका कारण उच्च रक्तचापका बिरामीहरुमा मृत्युको जोखिम बढी हुने गरेको पाइएको छ ।

सो तथ्यसँग सम्बन्धित यकिन अध्ययन तथा अनुसन्धान हालसम्म नगरिएता पनि उपचारमा संलग्न चिकित्सकहरुका अनुसार सो कुरा थाहा पाइएको हो ।

कोरोना संक्रमणको उद्गमस्थल बुहानमा कोरोना संक्रमितहरुको उपचारमा निरन्तर खटिएका डाक्टरहरुले सो कुरा बताएका हुन् ।

बुहानमा कोरोना संक्रमणको सुरुवाती दिनहरुमा मृत्यु भएका १७० जना मध्ये अधिकांश उच्च रक्तचापबाट पिडित रहेका थिए ।

पेकिङ युनियन मेडिकल कलेज हस्पिटलका बरिष्ठ डाक्टर दु बिनका अनुसार उनी तथा उनका सहकर्मी डाक्टरहरुले उपचारका क्रममा पाएका तथ्याङ्क हेर्दा उच्च रक्तचाप नै संक्रमितहरुको मृत्युको कारक रहेको छ । उनी कोरोना संक्रमितहरुको उपचारमा सुरुबाट नै बुहानमा खटिएका बरिष्ठ डाक्टर मध्ये एक हुन् ।

कोरोना भाइरसको संक्रमणका कारण हालसम्म विश्वभर १ लाख ८ हजार भन्दा बढी संक्रमित भएका छन् भने ३७०० भन्दा बढीले ज्यान गुमाइसकेका छन् ।

समाचारका अनुसार हाल चीनमा मात्र १५ हजार बढी संक्रमणको उपचार गराइरहेका छन् । तर चीनमा संक्रमणका कारण बिरामी परेका मध्ये ६ प्रतिशत मात्र गम्भिर प्रकृतिका रहेका छन् ।

चीनमा सो संक्रमण चाँडै नियन्त्रणमा आउनु र कम भन्दा कम बिरामी मात्र संक्रमणबाट मर्नुको पछाडी डा. बिन क्विक भेन्टिलेट विधिलाई जस दिन्छन् । उनका अनुसार संक्रमित विरामीहरुको घाँटीलाई जतिसक्दो खुल्ला गरेर फोक्सोमा पर्याप्त अक्सिजन पुर्याउन सके बिरामीको मर्ने सम्भावना कम हुन्छ ।

उनका अनुसार विभिन्न फर्मासिटिकल्सहरुले विभिन्न औषधीहरुको निर्माण गरेता पनि औसधि कोरोना रोकथामको म्याजिक बुलेट भने नभएको बताएका छन् । उनका अनुसार कोरोना संक्रमणलाई शरिरबाट निश्तज बनाउन उनीहरुको शरिरमा भएको रोग प्रतिरक्षा प्रणाली नै शशक्त हुन पर्दछ ।

पहिला सार्स संक्रमणको बेला पनि विशेष औषधि विना नै रोग नियन्त्रण गरिएको उनले बताए । सार्सले ८ हजार जना भन्दा बढीको ज्यान लिएको थियो ।

डा. बिनका अनुसार कोरोना संक्रमणको उपचार गराएर घर फर्किएका मानिसमा पुन: कोरोना संक्रमण नहुने कुनै ग्यारेन्टी नभएको भन्दै उनले सबै मानिस संक्रमणबाट बच्न पर्याप्त सावधानी अपनाउनु पर्दछ । यौटा रोग लागेको मानिसलाई पुन: सोहि रोगले भेट्न सक्ने सम्भावना प्रवल रहने पनि उनले बताए ।