देउवाले बोलाए केन्द्रीय समिति बैठक

काठमाडौं । असन्तुष्ट समूहले विवादित विषयमा सहमति नजुटेसम्म बैठकमा सहभागी नहुने चेतावनी दिएकै भोलिपल्ट नेपाली कांग्रेसले केन्द्रीय कार्यसमितिको बैठक बोलाएको छ ।

संस्थापन इतर समूहले विवादित विषयमा सहमति नजुटाएरै बैठक बोलाइए बहिष्कार गर्ने चेतावनी दिएको एक दिनपछि कांग्रेस सभापति शेरबहादुर देउवाले केन्द्रीय कार्यसमिति बैठक बोलाएका हुन् ।

कांग्रेसका मुख्य सचिव कृष्णप्रसाद पौडेलले पार्टीको केन्द्रीय कार्यसमितिको बैठक चैत ४ गतेका लागि बोलाइएको विज्ञप्तीमार्फत् जनाएका छन् ।

यसअघि संस्थापन इतर समूहले फागुन १४ गते बोलाइएको केन्द्रीय कार्यसमिति बैठक बहिष्कार गरेका थिए । फागनु १२ गते महासमितिको म्याण्डेट विपरित संस्थापन पक्षले बहुमतका आधारमा विधान पारित गरेपछि असन्तुष्ट समूहले अनुशासन समिति र निर्वाचन समिति पनि बहुमतकै आधारमा गठन हुने आशंकामा उक्त बैठक बहिष्कार गरेका थिए ।
बुधबार पार्टीका पूर्वमहामन्त्री प्रकाशमान सिंहको निवासमा बसेको बैठकले सभापति देउवाले सहमतिका आधारमा पार्टीभित्रका विवाद समाधान नगर्दासम्म केन्द्रीय कार्यसमिति बैठकमा सहभागी नहुने निर्णय गरेको छ ।