प्रधानमन्त्री ओलीलाई तत्काल डिष्चार्ज गर्न नसकिने, सामान्य मान्छे जस्तै बन्न ६ महिना देखी वर्षदिन लाग्ने

काठमाडौं – दोस्रो पटक मृगौलाको प्रत्यारोपण गरेका प्रधानमन्त्री ओलीलाई तत्काल डिस्चार्ज गर्न नसकिने चिकित्सकहरुले बताएका छन् । गत बुधबार मृगौला प्रत्यरोपण गराएका ओलीको स्वास्थ्य सूचकांकहरु समान्य भएपनि तत्काल डिस्चार्ज गर्ने मिति तोक्न नसकिने चिकित्सकहरुले बताएका हुन् ।

प्रधानन्त्रीका नीजि चिकित्सक डा. दिव्या सिंह शाहले अपेक्षाकृत सुधारका लक्षण देखिएको भनिएपनि डाक्टरहरुलाई डिस्चार्ज गर्नुपर्छ भन्ने एकिन नहुँदासम्म डिस्चार्ज गर्न नसकिने बताएकी छिन् । ‘अहिलेको अवस्था हेर्दा चाँडै डिस्चार्ज गर्न सक्छौँ । भोली नै पर्सी नै भनेर मिति तोक्न सकिँदैन तर छिटो भन्दा छिटो डिस्चार्ज गरेर पठाउँछौँ’, उनले भनिन् । डा. शाहले अहिले नै डिस्चार्ज गर्दा हुने भएपनि घरमा समेत अस्पतालको जस्तै व्यवस्थापन गर्नुपर्ने भएकाले केही समय लाग्ने बताए । परिवारले समेत घरमा व्यवस्थापन गर्नुपर्ने भएकाले केही दिन अस्पतालमा राख्न आग्रह गरेको उनले बताएकी छिन् ।

प्रधानमन्त्री ओलीले एक महिना सावधानी अपनाउनुपर्ने डा शाहले बताएकी छिन् । औषधिको डोज बढी भएका कारण संक्रमणको खतरा रहेपनि पहिले पनि प्रत्यारोपण गरेको र परिवारलाई समेत त्यस सम्बन्धि ज्ञान भएकाले संकट नआउने उनले बताईन् । ‘सुरुमा अलिकति सावधानी अपनाउनुपर्छ पहिलो १ महिना खासगरी । औषधिको डोज बढी भएकाले संक्रमणहरुको सम्भावना रहन्छ । तर उहाँले पहिले पनि प्रत्यरोपण गरेको र परिवारलाई पनि यस सम्बन्धि ज्ञान भएकाले यसमा त्यती संकट नआउला त्यही पनिउहाँले पुरै पब्लिक भएर भिडभाडमा जान हामी सल्लाह दिँदैनौँ । आफ्नो दैनिक काम सचिवालयबाट गर्न सक्नुहुन्छ ।’ डा. शाहले रुघाखोकी र अरु संक्रमण भएका व्यक्तिहरुबाट जोगिनुपर्ने बताईन् । सामान्य मान्छेहरु जस्तै सक्रिय हुन ६ महिना देखी वर्षदिनको समय लाग्ने उनले बताएकी छिन् ।

मृगौला प्रत्यारोपणपछि प्रधानमन्त्रीको स्वास्थ्यका विषयमा सार्वजनिक सञ्चारमाध्यमहरुमा विभिन्न टिकाटिप्पणी हुन थालेपछि प्रधानमन्त्रीका प्रेस सल्लाहकारको अगुवाईमा प्रत्यारोपणमा संलग्न चिकित्सकहरुसँग पत्रकारहरुको अन्तरक्रिया गराइएको हो ।