पार्टी सञ्चालनमा गुट उपगुटले समस्या भयो : कांग्रेस सभापति शेरबहादुर देउवा

काठमाडौं। कांग्रेस सभापति शेरबहादुर देउवाले पार्टी सञ्चालनमा गुट उपगुटले समस्या भएको बताएका छन् । नेपाल ट्रेड युनियन कांग्रेसको ७३औं स्थापना दिवसका अवसरमा राजधानीमा आयोजित कार्यक्रमलाई सम्बोधन गर्दै देउवाले गुटका कारण पार्टीभित्र काम गर्न गाह्रो भएको र गुट उपगुटको अन्त्य आफूले चाहेको बताए ।‘पार्टीभित्र गुट उपगुट धेरै भयो, गुटको अन्त्य गर्न मैले चाहेको छु, गुटको अन्त्य भएपछि काम गर्न सकिन्छ,’ सभापति देउवाले भने ।

छेउमै बसेका महामन्त्री डा. शशांक कोइरालाई आग्रह गर्दै सभापति देउवाले गुट अन्त्य गर्न आफूलाई सघाउनसमेत आग्रह गरे । ‘महामन्त्रीज्यू गुट अन्त्य गर्न मलाई सहयोग गर्नुस्, म पार्टीमा गुट अन्त्य गर्न चाहन्छु,’ महामन्त्रीलाई आफूतर्फ हेर्न आग्रह गर्दै उनले भने ।

देउवाले सरकार जनताका अधिकार खोसेर प्रजातन्त्रमाथि आक्रमण गर्न उद्यत् रहेको भन्दै सरकारले गरेका गलत काममा खबरदारी गर्नसमेत कार्यकर्तालाई आग्रह गरे ।
‘प्रजातन्त्रको रक्षाका लागि ठूलो आन्दोलन गर्नुपर्ने हुन सक्छ, तपाईंहरू तयार रहनुहोस्,’ उनले कार्यकर्तालाई भने ।
सरकारले सामाजिक सञ्जालमाथि बन्देज लगाउन प्रयास गरिरहेको उल्लेख गर्दै देउवाले भने, ‘जनताका मौलिक अधिकार खोसेर प्रजातन्त्रमाथि आक्रमण गर्न सरकार उद्यत् छ ।’