कोरोना आतंक – १२०० बढी कोरियालीहरु देश बाहिर आइसोलेशनमा

सोल-दक्षिण कोरियाली परराष्ट्र मन्त्रालयले मंगलवार सार्वजनिक गरेको सुचना अनुसार १२०० भन्दा बढी कोरियाली नागरिकहरु कोरोना संक्रमणको त्रास तथा शंकामा देश बाहिर आइसोलेशनमा राखिएका छन् ।

काम तथा व्यापारको शीलशीलामा देश बाहिर गएका ती कोरियालीहरु चीन, भियतनाम लगायतका देशहरुमा आइसोलेशनमा राखिएका छन् ।

मन्त्रालयका अनुसार हाल चीनमा सबै भन्दा बढी ९६० जना तथा भियतनाममा २७० जना आइसोलेशनमा राखिएका छन् ।

ठूलो संख्यामा आइसोलेशनमा राखिएका स्थानहरुमा सरकारी अधिकारीहरु पठाएर आफ्ना नागरिकको स्वास्थ्यस्थितिको जानकारि लिनु पर्ने सर्वसाधारण बताउछन् ।

साङ्घाई शहरका नगरपालिकाका एक अधिकारीले जनाए अनुसार कोरोना संक्रमित क्षेत्रबाट उक्त शहर भ्रमण गर्ने जो कोहीलाई पनि १४ दिन अस्पताल, होटल अथवा घरमै आइसोलेशनमा राखिने गरिएको छ ।

हाल आफ्नो देशमा कोरोना भाइरसको संक्रमण देखिन थालेपछि भारत, इटली लगायतका देशहरुले भिसा प्रकृयामा कडाई गर्न थालेका छन् भने कतिपय देशहरुले संक्रमण फैलिएका देशहरुका नागरिकहरुलाई आफ्नो देशमा प्रवेश निषेध तथा ति देशहरुमा नागरिकहरुलाई जान प्रतिवन्ध समेत लगाएका छन् ।