अमेरिका र तालिवानबीच ऐतिहासिक शान्ति सम्झौता

एजेन्सी – अफगानिस्तान पसेको १८ वर्षपछि अमेरिकाले तालिवानसँग शान्ति सम्झौता गरेको छ । अफगान सरकारले सम्झौताको स्वागत गर्दै ३० दिनभित्र स्थायी युद्धविरामका लागि प्रतिबद्धता व्यक्त गरेको छ । अमेरिकाले अफगानिस्तानको आन्तरिक मामिलामा हस्तक्षेप नगर्नेसमेत वचन पनि दिएको छ ।

अन्नपूर्ण पोष्ट दैनिकले लेखेको खबर अनुसार, सम्झौता कार्यान्वयन भएमा अबको १४ महिनापछि अमेरिकी तथा उसको सैन्य गठबन्धनका सुरक्षाफौज, गैरसैनिक व्यक्तिहरू अफगानिस्तानबाट फिर्ता हुनेछन् । साढे चार महिनामा हालको १४ हजारबाट अमेरिकी फौज आठ हजार ६ सयमा सीमित हुनेछन् ।

यता, अफगानिस्तानमा तालिवानसहितको नयाँ सरकार गठन हुनेछ । अमेरिकी सहयोगमा अफगानिस्तान सरकार, सरोकारवाला र तालिवान समूहबीच २७ फागुनमा वार्ता हुने तय भएको छ । त्यसअघि नै अफगानिस्तान सरकारले एक हजार तालिवान बन्दी रिहा गर्नेछ । तालिवानको मागअनुसार बाँकी चार हजार बन्दी थप तीन महिनामा रिहा हुनेछन् ।

तालिवानले अफगान भूमिमा अमेरिकाको सुरक्षाविपरीत गतिविधिमा पूर्ण रोक लगाउने तथा अमेरिकाले तालिवानविरुद्ध लगाइएको अन्तर्राष्ट्रिय प्रतिबन्ध हटाउने सहमति भएको छ ।

दोहामा अमेरिकी विदेशमन्त्री माइक पोम्पियोसहित अन्य ३० भन्दा बढी देशका कूटनीतिक प्रतिनिधिको रोहबरमा भएको शान्ति सम्झौतामा अमेरिकाका तर्फबाट विशेष दूत जालमे खालिलजाद र तालिवानका तर्पmबाट राजनीतिक उपप्रमुख अब्दुल घानी बरादरले हस्ताक्षर गरेका छन् । समारोहमा कतारका लागि नेपाली राजदूत डा। नारद भारद्वाज पनि सहभागी भए ।