भक्तपुर क्वारेन्टाईनमा रहेका नेपालीको आज पुनः स्वास्थ्य परिक्षण, घर पठाउने तयारी

भक्तपुर – चीनबाट १३ दिनअघि नेपाल ल्याइएका नेपालीलाई आव शनिबार पुनः स्वास्थ्य परीक्षण गरेर घर फर्काउने तयारी भएको छ ।

पुनः परीक्षणबाट संक्रमण नभेटिएकाहरुलाई घर पठाइने सरकारले जनाएको छ ।

गएको फागुन ४ गते चीनबाट ल्याइएकाहरुलाई भक्तपुरको खरिपाटीस्थित ‘क्वारेन्टाइन’मा राखिएको छ ।

रोचक त के छ भने चीनबाट विद्यार्थीलगायतलाई लिन गएको २५ जनाको टोली सदस्यहरुलाई पनि क्वारेन्टाइनमै राखिएको छ । उनीहरुको पनि पुनः स्वास्थ्य परीक्षण हुँदैछ ।

यसअघि पनि उनीहरुको घाँटी र नाकभित्रको स्वाबको परीक्षण गरिएको थियो ।

उनीहरुलाई स्वास्थ्य मन्त्रालयले शनिबार र आइतबार फेरि घाँटी र नाकभित्रको स्वाब परीक्षण गर्दै छ ।

राष्ट्रिय जनस्वास्थ्य प्रयोगशालाबाट सबैको स्वास्थ्य परीक्षणपछि नतिजा हेरेरमात्र उनीहरुलाई घर पठाइने नेपाली सेनातर्फका चिकित्सक डा. नविन फुयाँलले बताए ।

परीक्षणपछि संक्रमण भेटिएकाहरुलाई भने थप उपचारका लागि अस्पताल ‘रिफर’ गरिने छ ।