शेयर बजारमा हरियाली छायो

काठमाडौं -अघिल्लो साता डरलाग्दो किसिमले तल झरेको शेयर बजारमा यस साताको मध्यबाट उत्साहको नयाँ माहोल सिर्जना भएको छ । शेयर मूल्य धेरै घटेका राम्रा तथा सुरक्षित कम्पनीहरुमा खरिदकर्ताको चाप पर्दा नेप्से र कारोबार रकम दुवैमा उल्लेखनीय बढोत्तरी भएको छ ।

तिब्र गिरावटका बिच सुधारको क्रममा रहेको शेयर बजार परिसुचक नेप्से बुधबार ५० अंक बढीले उकालो लागेको छ । अधिकांस कम्पनीको शेयरमा अधि मात्रामा खरिद चाप परेसँगै बजार खुलेदेखि उकालो लागेर केही बेर उतार चढाव गरी बन्द हुँदा ५४ दशमलव ६५ अंकले सुधारिएको हो ।

बजार खुलेदेखि नै अधिक मात्रामा खरिदकर्ताको चाप आए पछि बजार परिसुचक नेप्से बुधबार १६०८।३३ अंकमा उक्लिएको हो । केही दिन अघि मात्र त्रिब्र गिरावटका क्रममा १४०४ अंकसम्म झरेको बजारमा लगानीकर्ताको उत्साह बढेसँगै अब लगानीकर्ताले धेरै मूल्य घटेका राम्रा राम्रा कम्पनीको छनौट गरी शेयर किन्न थालेका हुन् ।

ठुलो अंकको उतार चढावका बेला लगानीकर्ताले उचित निर्णय लिन नसक्ने भए पनि अब बजार उतार चढावको क्रमबाट उकालो लाग्ने क्रममा आएको हो । यस क्रममा बुधबार नेप्सेमा एक सय ३५ कम्पनीका १५ लाख २५ हजार चार सय नौ कित्ता शेयरहरु आठ हजार छ सय ८९ कारोबारबाट १ अर्ब ३६ करोड ३५ लाख ८१ हजार रुपैंयामा किनबेच भएका छन् ।

बजार सुधारात्मक बन्दै जाँदा बुधबार एभरेष्ट बैंकको मात्र २० करोड बढीको शेयर कारोबार भएको छ । त्यस पछि बैंक अफ काठमाण्डू लुम्बिनी, शिखर इन्स्योरेन्स, सिद्धार्थ बैंक लगायतका वाणिज्य बैंक तथा बीमा कम्पनीको अधिक मात्रामा शेयर किनबेच भएको छ ।

मध्यमस्तरको मूल्यमा वाणिज्य बैंकको शेयर पाइराखिएकाले पनि जोखिम वहन गर्न लगानीकर्ताको आकर्षण यस्ता बैंकहरुको शेयरमा बढेको देखिएको हो । यस क्रममा बैंक अफ काठमाण्डू लुम्बिनीको सबै भन्दा धेरै संख्यामा शेयर किनबेच भएको छ । मेगा, सिभिल, सिद्धार्थ माछापुछ्रे, कुमारी एनबी बैंक लगायतको धेरै संख्यामा शेयरहरु किनबेच भएका छन् |होटल समुह स्थिर रहेको बजारमा सबै समुहगत परिसुचक तिब्र सुधारसँगै हरीयो बनेका छन् ।

धेरै कमाउनेको सूचीमा भने विकास बैंक तथा लघुवित्त कम्पनीहरुको वर्चस्व देखिएको छ । नेशनल लाइफ इन्स्योरेन्सको अधिक शेयर मूल्य बढेको बजारमा दुई दर्जन कम्पनीहरुको शेयर मूल्य आठ प्रतिशत भन्दा बढीले महंगिएको छ । त्यसै गरी बजारमा गुमाउनेको सूचीमा लघुवित्त कम्पनी, बीमा कम्पनी तथा विकास बैंकहरु रहेका छन् ।

बजार करेक्सनको एउटा विन्दुमा पुगेर माथि चढ्दै गर्दा बजार प्रवेश गर्नेहरुले सुरक्षित महसुस गर्ने सक्ने अवस्था बनेको संकेत बुधबारको बजारले देखाएको छ । घटिरहेको बजार प्रवेश भन्दा बढ्न सुरु गरेको बजार प्रवेश फाइदाजनक अनि सुरक्षित हुने भएकाले लगानीकर्ताका लागि लगानीको अवसर बजारले दिएको छ ।