१२ दिनअघि विश्व रेकर्ड कायम गरेका १ सय १२ बर्षे जापानी नागरिकको मृत्यु

टोकियो-हालसम्म संसारकै सबै भन्दा बढी बर्ष बाँच्ने मानिसको सूचीमा गिनिज बुक अफ वर्ल्ड रेकर्ड बनाएका एक जापानी नागरिकको आईतवार आफ्नै निवास क्षेत्रको एक नर्सिङ होममा निधन भएको छ ।

चितेत्सु वातानावे नाम गरेका ती व्यक्ति सन् १९०७ मार्च ५ तारिखमा जापानको जोइत्सु क्षेत्रमा जन्मिएका हुन । उनी आफैले गिनिज बुक अफ वल्र्ड रेकर्डले दिएको प्रमाण पत्र समेत ग्रहण गरेका थिए ।

वातानावे जापानकै अर्का विश्वकै सबै भन्दा बढी बाँचेका मासाजु नोनाका पछिका सबै भन्दा बढी बाँच्ने मानिस रहेका थिए । नोनाका ११३ बर्ष बाँचेका थिए र उनी २०१९ को जनावरी २० मा स्वर्गवास भएका थिए ।

खानपानमा सहजता नभए पश्चात उनी बिरामी परेका थिए र सोहि कारण उनलाई अस्पताल भर्ना गरिएको थियो । उनको उपचारमा कुनै कसर बाँकी नराखेता पनि उमेरका कारण नै उनको निधन भएको अस्पतालको भनाई उदृढ गर्दै परिवारले जनाएको छ ।

२० बर्षको उमेरमा ताइवान गएर १८ बर्ष त्यहीँ बसेका उनी दोश्रो विश्वयुद्ध पश्चात पुनः जापान आएर अवकाश नहुन्जेल सरकारी सेवामा रही काम गरेर बसेका थिए। हाल उनका ५ जना छोराछोरी, १६ जना नाती नातीना तथा १ जना पनाती समेत रहेको परिवारले जानकारी दिएको छ ।

जापान दीर्घ जीवन जीउने मानिसहरुको देशको रुपमा परिचित छ । यस अघि काने तानाका पनि ११७ बर्ष बाँचेर विश्व किर्तिमान कायम गरेको तथ्यांक छ ।