अख्तियारको निगरानीमा रहेका बाँस्कोटालाई २५ करोड जरिवाना र ८ वर्ष कैद हुनसक्छ

काठमाण्डौ-सेक्युरिटी प्रेस स्थापना गर्न स्विस कम्पनीसँग कमिसन मागेको अडियो सार्वजनिक भएपछि राजीनामा दिएका पूर्व सञ्चारमन्त्री गोकुलप्रसाद बाँस्कोटा अख्तियार दुरुपयोग अनुसन्धान आयोगको निगरानीमा रहेका छन् ।

७० करोडको कमिसन डिल गरेको अडिओ सार्वजनिक भएपछि संचार मन्त्रीबाट राजीनामा दिएका बाँस्कोटालेलाई भ्रष्टाचारको कसुरका लागि उद्योग गरेको ठहर भए आठ वर्षसम्म कैद र २५ करोड ४५ लाख रूपैयाँसम्म जरिवाना हुनसक्ने भएको छ ।

भ्रष्टाचार निवारण ऐन २०५९ को दफा २१ अनुसार भ्रष्टाचारको सजाय हुने कसुर गर्ने उद्योग गर्नेलाई आधा सजाय हुने व्यवस्थाअन्तर्गत उनलाई सो सजाय हुनेछ ।

अडियोमा प्राप्त ७४ करोडको ७० प्रतिशत अर्थात् ५१ करोड ९० लाख उनले कमिसन पाउने भएपछि त्यसको आधा अर्थात् २५ लाख ४५ हजार रुपैयाँ जरिवाना हुनसक्छ ।

भ्रष्टाचार निवारण ऐनको परिच्छेद २ को दफा ३ अनुसार एक करोड रुपैयाँभन्दा बढी भ्रष्टाचारको कसुर ठहर भए बिगोबमोजिम जरिवाना र ८ देखि १० वर्षसम्म सजाय हुने व्यवस्था छ । ऐनको दफा २१ अनुसारको व्यवस्था बाँस्कोटाको हकमा आकर्षित हुनेछ । त्यो भनेको कुल सजायको आधा हो ।

तर, ऐनको दफा २४ मा भएको थप सजायसम्बन्धी व्यवस्थाका कारण बाँस्कोटाले भ्रष्टाचारको कसुरका लागि उद्योग गरेको ठहर भए थप तीन वर्ष कैद सजाय हुने व्यवस्था छ ।