रक्सौल–काठमाडौं रेलमार्गको डीपीआर बनाउन भारतको बजेट

काठमाडौं – रक्सौल–काठमाडौं विद्युतीय रेलमार्गको विस्तृत परियोजना प्रतिवेदनका लागि भारत सरकारले बजेट विनियोजन गरेको छ । भारतीय अर्थमन्त्री निर्मला सीतारमणले संसद्मा प्रस्तुत गरेको बजेटमा परियोजनाको डीपीआरका लागि बजेट विनियोजन गरिएको हो । बजेटको कत्ति छुट्याईएको भन्नेबारे भने खुलाईएको छैन ।

यस वर्ष नेपाललाई दिने अनुदानबाट पनि उक्त रकम खर्च गरिने अनुमान छ । यस वर्ष भारतले नेपाललाई ८ अर्ब भारु अर्थात १२ अर्ब ८० करोड रुपैयाँ अनुदान दिने घोषणा गरेको छ । भारतको केन्द्र सरकारले विदेश मन्त्रालयमार्फत विभिन्न मुलुकलाई दिने अनुदान परिचालन गर्ने गर्छ ।

आगामी वर्ष बिहार राज्यमा कार्यान्वयनमा ल्याइने रेलवेअन्तर्गतका पूर्वाधार कार्यक्रमअन्तर्गत यो परियोजनाको डीपीआरलाई पनि समावेश गरिएको छ ।

रेलवे विभागका महानिर्देशक बलराम मिश्रले पनि बजेट विनियोजनबारे सुनेको बताए ।