प्लाष्टिक उद्योगमा आगलागी

काठमाडौँ – वीरगञ्ज पथलैया औद्योगिक क्षेत्रअन्तर्गत रहेको अमृत प्लाष्टिक उद्योगमा आगलागी लागेको छ ।

वीरगञ्ज महानगरपालिका वारुणयन्त्र शाखाका नेहाल अहमदका अनुसार आगो वीरगञ्ज महानगरपालिकाको तीन, कलैया उपमहानगरपालिकाको एक, जितपुरसिमरा उपमहानगरपालिकाको एक र पोखरिया नगरपालिकाको एक गरी ६ वटा दमकल प्रयोग गरी सुरक्षाकर्मी र स्थानीयले नियन्त्रणमा लिएको हो । बुधबार बिहान आगो साढे तीन घण्टामा मात्र नियन्त्रणमा लिइएको थियो।

जिल्ला प्रहरी कार्यालय पर्साका प्रहरी नायब उपरीक्षक वीरेन्द्रबहादुर शाहीले आगलागीमा उद्योगका मेसिन र कच्चा पदार्थसहित केही तयारी सामान पनि जलेर नष्ट भएको जनकारी दिएका छन् । उनले आगो कसरी लाग्यो भन्ने अनुसन्धान भइरहेको जानकारी दिएका छन् । क्षतिको पूर्णविवरण यकिन भने हुन बाँकी छ।

उद्योग सञ्चालक वीरगञ्ज–१६ का राजेश दास तत्वाले भने ७० लाख रुपैयाँ बराबरको क्षति भएको बताएका छन्।