कोरोना भाइरससँग जुध्ने क्रममा कमजोरी भएको चीनका शीर्ष नेतृत्वको स्वीकारोक्ति

एजेन्सी – कोरोनाभाइरसको प्रकोपसँग जुझ्ने क्रममा सरकारी कमजोरी र अपूर्णता पाइएको चीनको शीर्ष नेतृत्वले स्वीकार गरेका छन् ।

चिनियाँ कम्युनिष्ट पार्टीको पोलिटब्युरो स्थायी समितिले राष्ट्रिय आपतकालीन व्यवस्थापन प्रणालीको सुधार गर्नुपर्ने औंल्याएको छ ।

सातजना शीर्ष नेता रहेको समितिले भाइरसको उत्पत्ति भएको ठानिएको वन्यजन्तु बजारलाई अनुसन्धान गरी कारबाहीको दायरामा ल्याउन निर्देशन दिएको छ।

नियाँ नेतृत्वले यस प्रकोपलाई एउटा ठूलो परीक्षा भन्दै चीनको शासन प्रणालीमा थुप्रै पाठहरू सिक्नुपर्ने बताइएको चीनको सरकारी समाचार संस्था सिन्ह्वाले जनाएको छ ।

उनीहरूले गैरकानुनी वन्यजन्तुको क्षेत्रलाई गम्भीरतापूर्वक हेरिनुपर्ने बताएका छन्।

त्यसलाई उनीहरूले दृढतापूर्वक प्रतिबन्ध लगाउनुपर्ने बताउँदै त्यस्ता बजारमा हुने अनुगमनलाई बढाउनुपर्ने जनाएका छन्।

वुहान शहर आफूहरूको उच्च प्राथमिकतामा रहेको भन्दै त्यहाँ थप स्वास्थ्यकर्मी पठाइने उक्त शीर्ष समितिले जनाएको छ।

नयाँ कोरोनाभाइरस गैरकानुनी रूपमा व्यापार गरिने वन्यजन्तुमार्फत् वुहानको समुद्री खाद्य बजारबाट फैलिएको अनुमान गरिएको छ।