भरतपुर अस्पतालमा चौबिसै घण्टा डायलेसिस सेवा उपलब्ध

काठमाण्डौ-चितवनको भरतपुर अस्पतालमा डायलेसिस गर्नुपर्ने मिर्गाैलाका बिरामीको चाप बढेपछि चौबिसै घण्टा सेवा शुरु गरिएको छ। बिहानदेखि साँझसम्म डायलेसिस गर्दा बिरामीले पालो नपाएपछि सेवा विस्तार गरिएको हो।

सेवा विस्तार गर्दै अस्पतालका प्रमुख मेडिकल सुपरिटेन्डेन्ट डा. श्रीराम तिवारीले पालो कुर्ने बिरामीको सङ्ख्या बढेपछि आजदेखि रात्रिकालीन सेवा शुरु गरिएको बताए। सो अवसरमा तिवारीले हाल ६९ जनाले नियमित डायलेसिस गरिरहेको बताएका छन्। तीमध्ये ३० पुरुष र ३९ महिला रहेका छन्। अरू थप ५० जना बिरामीले पालो कुरिरहेकाले रात्रिकालीन सेवा शुरु गरिएको तिवारीले बताए।

अस्पतालको मेडिसिन विभाग प्रमुख डा. प्रकाश खतिवडा, डायलेसिस विभाग प्रमुख सुनिता आचार्य लगायतले अस्पतालमा मूत्ररोग विशेषज्ञको व्यवस्था हुन सकेमा बिरामीले थप सेवा पाउनेमा जोड दिईएको बताए। भरतपुर अस्पतालमा डायलेसिस सेवा निजीको भन्दा उत्कृष्ट भएपछि बिरामीको पहिलो रोजाइ हुने गरेको छ। जसका कारण बिरामीको सङ्ख्या दिनानुदिन बढ्दै गएको छ।

अस्पतालका सूचना अधिकारीका अनुसार अस्पतालमा २०७४ साल भदौ ११ गतेबाट निःशुल्क रुपमा डायलेसिस सेवा शुरु गरिएको हो। गत आर्थिक वर्षमा ६ हजार एक सय पटक र चालु आवको ६ महिनामा तीन हजार २३० पटक विभिन्न बिरामीको डायलेसिस गरिएको छ। अस्पतालमा रहेका १२ वटा डायलेसिस उपकरणमध्ये १० वटा सञ्चालनमा रहेका छन्।

सरकारले मिर्गाैलाको डायलेसिस सेवा निःशुल्क गरेको छ। भरतपुर अस्पताल केन्द्रीय अस्पताल हो। यहाँ चितवनसहित १९ भन्दा बढी जिल्लाका बिरामी उपचारका लागि आउने गर्दछन।