अख्तियारका सचिव न्यौपानेलाई सर्वोच्चले बोलायो

काठमाडौं-अख्तियार दुरुपयोग अनुसन्धान आयोगका सचिव महेश्वर न्यौपानेलाई भ्रष्टाचार सम्बन्धी एउटा मुद्दाको अभिलेख लिएर १५ दिनभित्र उपस्थित हुन सर्वोच्च अदालतले आदेश दिएको छ ।

न्यायाधीशहरु मीरा खड्का, ईश्वरप्रसाद खतिवडा र सुष्मालता माथेमाको संयुक्त इजलासले सचिव न्यौपानेलाई अनिवार्य आफैं उपस्थित हुन आदेश दिएको हो ।

नेपाल आयल निगमका तत्कालिन महाप्रबन्धक युवराज शर्माको भ्रष्टाचार मुद्दाको अभिलेख पटक पटक ताकेता गर्दा पनि दिन अख्तियारले नसकेपछि अदालतले आफैं उपस्थित हुन भनेको हो ।

सामान्य प्राविधिक कारण देखाई अदालतबाट माग गरिएका मुद्दासँग सम्बन्धित अभिलेख पेश गर्न आलटाल गर्ने र जिम्मेवारीबाट पन्छिन खोज्ने प्रवृतिलाई उचित ठान्न नसकिने सर्वोचले जनाएको छ । यसअघि २०७५ कात्तिक ८ गते र फागुन २३ गते पनि सर्वोच्चले अभिलेखसहित उपस्थित हुन सचिव न्यौपानेको नाममा आदेश दिएको थियो ।