महिन्द्रा एक्सयूभीलाई फाइभस्टार सुरक्षा रेटिङ प्रदान

काठमाडौं- कार सुरक्षा परीक्षण निकायहरूको सर्वोच्च निकाय ग्लोबल एनसीएपीले महिन्द्रा एक्सयूभी ३०० लाई उच्चतम फाइभस्टार सुरक्षा रेटिङ प्रदान गरेको छ ।

एक्सयूभी ३०० ग्लोबल एनसीएपीद्वारा परीक्षण गरिएका सबै फाइभस्टार रेटिङप्राप्त भारतीय सवारीसाधनमध्ये सर्वाधिक अंक प्राप्त गर्ने पहिलो सवारी साधन बनेको महिन्द्राले बताएको छ ।

२० अर्ब ७ करोड अमेरिकी डलरको महिन्द्रा ग्र्पको एक हिस्सा महिन्द्रा एन्ड महिन्द्राको कम्प्याक्ट एसयूभी–३०० ले सो रेटिङ पाएको हो । एक्सयूभी ३०० बालबालिकाको सुरक्षामा पनि फोरस्टार रेटिङ पाउने पहिलो भारतीय सवारी हो ।

फाइभस्टार रेडिङका लागि छेउबाट पर्ने धक्काको असर कम हुने प्रदर्शन पूर्वशर्तमध्ये एक हो । छेउबाट पर्ने धक्काको असर कम हुने प्रदर्शनमा सबै फाइभस्टार रेटिङ पाएका कारमध्ये एक्सयूभी ३०० को प्रदर्शन सबैभन्दा उत्तम भएको कम्पनीको दाबी छ ।

‘यो उपलब्धि महिन्द्राका लागि गर्वको विषय हो, फाइभस्टार रेटिङले सुरक्षाप्रति हाम्रो निरन्तरको प्रतिबद्धतालाई पुष्टि गरेको छ,’ महिन्द्रा एन्ड महिन्द्राको अटोमोटिभतर्फका प्रेसिडेन्ड राजन वाढेराले बताए ।

महिन्द्रा एक्सयूभी ३०० मा ७ ओटा एयरब्याग, चार ओटै पांग्रामा डिस्क बे्रक, फ्रन्ट पार्किङ सेन्सर र हिटेड ओआरभीएमसहितका ‘फस्र्ट–इन–सेगमेन्ट’का थुप्रै विशेषता छन् ।