दक्षिण कोरिया पुगेकी ट्रम्पपुत्रीले भनिन – उत्तर कोरियामाथि ‘अधिकदम दबाब’ दिनुपर्छ

सोल – हिउँदे ओलम्पिकको समापन समारोहमा सहभागी हुन अमेरिकी टोलीको नेतृत्व गर्दै दक्षिण कोरिया पुगेकी राष्ट्रपति डोनाल्ड ट्रम्पपुत्री इभान्काले उत्तर कोरियामाथि ‘अधिकतम दबाब’ सिर्जना गर्नुपर्ने बताएकी छन्।

उत्तर कोरियाली नेता किम जोङ उनकी बहिनी किम यो जोङको भ्रमणको २ सातापछि दक्षिण कोरिया पुगेकी ट्रम्पपुत्रीको यो भनाइ दक्षिण कोरियाली राष्ट्रपति मुन जे इनसँग बाझिन पुगेको छ।

शुक्रबार इभान्काले राष्ट्रपति मुनसँग डिनर गरेकी छन्। मुनले दुई कोरियाबीच सक्रिय संवादले कोरियाली प्रायद्वीपमा शान्तिका लागि योगदान पुग्ने बताए।

इभान्काले भने प्रायद्वीपको आणविक निशस्त्रीकरणका लागि उत्तर कोरियामाथि अधिकतम दबाब दिइनुपर्ने तर्क गरिन्।

इभान्का दक्षिण कोरिया पुग्दैगर्दा अमेरिकाले हालसम्मकै ठूलो मानिएको नाकाबन्दी उत्तर कोरियामाथि घोषणा गरेको छ। यो प्रतिबन्ध २७ व्यापारिक तथा जलपरिवहन कम्पनी र २८ व्यक्ति तथा जहाजलक्षित छ।