प्रदेश ५ को हिउँदे अधिवेशन आजदेखिः प्रदेश राजधानी र नाम टुँग्याउने कसरत

बुटवल – प्रदेश ५ को हिउँदे अधिवेशन आजदेखि सुरु हुँदै छ । मुख्यमन्त्री शंकर पोखरेलको सिफारिस र प्रदेश प्रमुख धर्मनाथ यादवको आह्वानमा आजदेखि हिउँदे अधिवेशन बोलाइएको हो ।

बैठक दिउँसो १ बजे बस्ने प्रदेश ५ को प्रदेशसभा सचिवालयले जनाएको छ । यसअघि गत जेठ २ गते सुरु भएर असोज २ मा बजेट अधिवेशन सकिएपछि प्रदेश ५ को संसद विजनेस विहिन भएको छ ।

हिउँदे अधिवेशनको पहिलो दिन शुभकामना मन्तव्य राख्ने कार्यक्रम रहेको छ । प्रदेश १ र २ सँगै ५ ले अझै नाम र स्थायी राजधानी टुंग्याउन सकेको छैन ।

हिउँदे अधिवेशनले प्रदेशको नाम र स्थायी राजधानी टुंग्याउने प्रदेश ५ सरकारका प्रवक्ता एंव भौतिक पूर्वाधार विकास मन्त्री वैजनाथ चौधरीले बताए ।

प्रदेश ५ सरकारले आजबाट सुरु हुने हिउँदे अधिवेशनमा ६ वटा विधेयक पठाउने तयारी गरेको छ ।