तेस्रो कुम्मायक गोल्डकप २०७६ : कुम्मायक गाउँपालिकाले तुम्बेवा गाँऊपालिकालाई हरायो

काठमाडौ-तेस्रो कुम्मायक गोल्डकप २०७६ को उद्घाटन खेलमा कुम्मायक गाउँपालिकाले तुम्बेवा गाँऊपालिकालाई ३-२ गोलअन्तरमा हराउदैँ सेमिफाइनलमा प्रवेश गरेको छ। 

उद्घाटन खेल पाँचथरको पृथ्वी मा.वि.को खेलमैदान यासोकमा भएको पहिलो खेलको १९औँ मिनेटमा राजेश थापाले गोल गर्दै तुम्बेवा टिमलाई १-० को अग्रता दिलाएका थिए। २९ औँ मिनेटमा कुम्मायकका दिप्सन लावतीले आकर्षक हेड गोल गर्दै खेललाई १-१ को बराबरीमा ल्याउन सफल भए। पहिलो हाफ १-१ गोलको बराबरीमा सकिएको थियो।

दोस्रो हाफको कुम्मायका दिप्सन लावतीले नै दोस्रो हाफको ५४ औँ मिनेटमा हेडरमार्फत अर्को गोल गरेर २-१ को अग्रता दिलाए। रोमाञ्चक बनेको दोस्रो हाफको खेलमा कुम्मायका लोकेन्द्र थापाले ६४ औँ मिनेटमा गोल गरेर ३-१ को सहज अग्रता दिलाएका थिए। खेलमा फर्किने प्रयास गरेको तुम्बेवाका लागि ६८ औँ मिनेटमा फेरि राजेश थापाले गोल गरेर गोलअन्तर ३-२ मा झारेको थिए। खेलको म्यान अफ दी म्याच कुम्मायक गाउँपालिकाका दिप्सन लावती घोषित भए। उनले नगद ३,०००/- पाएका छन्। 

कुम्मायक गोल्डकपको विजेताले नगद रु.१,११,१११ रुपैयाँसहित २ किलो चाँदीको ट्रफी मेडल र प्रमाणपत्र पाउनेछ। उपविजेताले भने नगद रु.५५,५५५/- सहित मेडल प्राप्त गर्नेछ।

पाँचथर जिल्लाका ८ गाँऊपालिका र एक नगरपालिका सहभागी हुने कुम्मायक गोल्डकप स्थानीय कुम्मायक स्पोर्टिङ क्लबले आयोजना गरेको हो। गोल्डकपको प्रवर्द्धक कुम्मायक गाउँपालिका रहेको छ।

आज हुने खेलहरू
१.फालेलुङ गाउँपालिका विरुद्ध हिलिहाङ गाउँपालिका

२.फिदिम नगरपालिका र याङवरक गाउँपालिका