ए डिभिजन लिगको सातौं चरणको खेल शुक्रबारदेखि सुरु

काठमाडौं-शहीद स्मारक ए डिभिजन लिगमा शुक्रबारदेखि सातौं चरणको खेल हुने भएको छ। मंगलबार छैटौं चरणका खेल सकिएपछि सातौं चरणका खेलहरु शुक्रबारदेखि शुरु हुन लागेको हो।

सातौं र आठौं चरणका सबै खेलहरु दशरथ रंगशालामा हुने अखिल नेपाल फुटबल संघ एन्फाले जनाएको छ।

पहिलो दिन लिगको शीर्ष स्थानमा रहेका मछिन्द्र र पुछारबाट दोस्रो स्थानमा रहेको हिमालयन शेर्पाबीचको खेल हुनेछ।
खेल दिउँसो ३ बजेदेखि सुरु हुनेछ। शनिबार मध्यान्ह १२ बजे जावलाखेल र नेपाल पुलिस तथा दिउँसो तीन बजे मनाङ मर्स्याङ्दी र थ्रीस्टार भिड्ने छन्।

आइतबार एनआरटी र एपीएफ मध्यान्ह १२ बजे भिड्दा फ्रेण्ड्स र सरस्वती दिउँसो ३ बजे आमने सामने हुनेछन्।

सोमबार विग्रेड ब्वाईज र संकटा मध्यान्ह १२ बजे भिड्दा च्यासल र त्रिभुवन आर्मी दिउँसो ३ बजे आमने सामने हुनेछन्।