प्रचण्डले भने– द्धन्दकालमा मारिएका पाँच हजारको मात्रै जिम्मा लिन्छु

काठमाडौं – नेपाल कम्युनिष्ट पार्टी नेकपाका अध्यक्ष पुष्पकमल दाहाल प्रचण्डले माओवादी द्धन्दकालमा मारिएकामध्ये ५ हजारको मात्रै जिम्मेवारी आफूले लिने बताएका छन् ।

बाँकी १२ हजारको जिम्मा तत्कालीन राजा र राज्यपक्षले लिनुपर्ने उनको भनाई छ ।

साथै उनले साढे चार वर्षअघि कैलालीमा भएको टिकापुर हत्याकाण्डमा दोषी ठहर रेशम चौधरीलाई छुटाइने घोषणा पनि गरेका छन् ।

काठमाण्डूको टुँडिखेलमा भएको कार्यक्रममा उनले द्वन्द्वकालमा भएका घटनाको सोलोडोलो जिम्मा आफ्नो काँधमा हालिदिने प्रवृत्तितर्फ सङ्केत गर्दै त्यो गलत भएको बताए ।

दश वर्ष चलेको द्वन्द्वका बेला मारिएका १७ हजार मानिसबारे उनको जिम्मेवारीबारे वक्ताले प्रश्न उठाएपछि प्रचण्डले जवाफमा त्यसो भनेका थिए ।

प्रचण्डले भने ‘मैले १७ हजार मानिस मारेर आएको भन्ने तथ्याङ्क भनिन्छ । यो सत्य होइन । सत्य के हो भने हिजोको राज्यले १२ हजार मारेको हो । तर पाँच हजारको जिम्मा मलाई दिनुहुन्छ भने म जिम्मा लिन्छु । राज्यले मारेका पनि मेरै टाउकोमा हालियो भने यो न्याय हुँदैन ।’

आफूले रेशम चौधरीलाई प्रधानमन्त्रीकै हैसियतमा भारतमा भेटेको र पछि पनि डिल्लीबजार जेलमा भेट्न गएको पनि उनले बताए ।

टीकापुरमा नौ जनाको हत्या भएको घटनामा सांसद चुनिएका रेशम चौधरीसहित ११ जनालाई दोषी ठहर गर्दै कैलाली जिल्ला अदालतले जन्मकैदको फैसला गरेको थियो।