बालुवाटारमा एकता संयोजन समितिको बैठक बस्दै

काठमाडौं – पहिलो पटक एमाले र माओवादी केन्द्रको एकता संयोजन समितिको प्रधानमन्त्री निवास बालुवाटारमा बस्ने भएको छ। आज साँझ ७ बजे दुई पार्टीबीच एकताका लागि गठन गरिएको संयोजन समितिको बैठक बालुवाटारमा बस्न लागेको हो।

एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल ‘प्रचण्ड’ बीच आइतबार भएका सहमतिहरुलाई आजको बैठकले अनुमोदन गर्नुका साथै एकताका लागि थप गृह कार्य गर्ने कार्यदल आजको बैठकले बनाउनेछ।

आइतबार झण्डै पाँच घण्टा माओवादी निकट व्यवसायी दुर्गाप्रसाद प्रसाईंको ठिमीस्थित निवासमा बसेको बैठकमा ओली र प्रचण्डले एकताका लागि सैद्धान्तिक विषय टुङ्ग्याइसकेका छन्।

जस अनुसार एमालेले मार्ग निर्देशक सिद्धान्त मान्दै आएको जनताको बहुदलीय जनवाद जबज) र माओवादीले मान्दै आएको माओवाद दुबैलाई महाधिवेशनबाट टुङ्ग्याउने सहमति भइसकेको छ।