थ्री स्टार फ्रेन्ड्स क्लबसँग पराजित

काठमाडौं – सहिद स्मारक ‘ए’ डिभिजन लिग फुटबलमा थ्री स्टार क्लब पराजित भएको छ।

त्रिपुरेश्वरस्थित दशरथ रंगशालामा आइतबार भएको ललितपुर डर्बीमा थ्री स्टार फ्रेन्ड्स क्लबसँग १-० गोल अन्तरले पराजित भएको हो।

बलियो टिम थ्री स्टारविरुद्ध फ्रेन्ड्सलाई जित दिलाउन ब्राजिलियन खेलाडी वाग्नेर डी कार्मोले निर्णायक गोल गरे।कार्मोले खेलको १३ औं मिनेटमा गोल गर्दै फ्रेन्ड्सलाई जित दिलाए। विश्व अधिकारीको फ्रिकिक बलमा उनले हेड गोल गरेका थिए। वाग्नेर नेपाली लिगमा गोल गर्ने पहिलो ब्राजिलियन खेलाडी समेत बनेका छन्।

फ्रेन्ड्ससँग पराजित भएसँगै थ्री स्टारले लिगको दोस्रो स्थानमा उक्लने मौका गुमाएको छ। थ्री स्टारले ६ खेलमा १० अंक जोडेको छ। थ्री स्टार लिगको चौंथो स्थानमा रहेको छ।