रोजगारीका लागि कुवेत हिँडेका दश महिला विमानस्थलबाट फर्काइए

काठमाडौं – सरकारले प्रतिबन्ध लगाएको कुवेत जान भनी हिँडेका १० महिलालाई नक्कली भिषामा वैदेशिक रोजगार विभागले सक्कली स्टिकर र छाप लगाएको भेटिएको छ। विभागले नक्कली भिषाका आधारमा विभिन्न जिल्लाका १० जना महिलालाई कुवेतका लागि श्रम स्वीकृति दिएको हो।

त्रिभुवन अन्तर्राष्ट्रिय विमानस्थल अध्यागमन कार्यालयले फागुन १ मा पक्राउ गरेर अध्यागमन विभागमा बुझाएका १० जना महिलाले बोकेको संस्थागत भिषा नक्कली भएको खुलेको हो। उनीहरुले अध्यागमनलाई छक्याउन बोकेको नक्कली भिषाका आधारमा राहदानीमा विभागले प्रक्रिया पूरा गरेर स्टिकर र छापा लगाएको छ।

विभाग स्रोतका अनुसार महिलाहरुले घरेलु कामदार र कार्यालय सहयोगी (संस्थागत) गरी दुईथान भिषा आफूसँग बोकेका थिए। विभागले उनीहरुको संस्थागत भिषाका आधारमा श्रम अनुमति दिएको अनुसन्धानमा भेटिएको हो।

विमानस्थल अध्यागनमा सेटिङ मिल्दासम्म यस्ता घटना बाहिर अाउँदैनन्। कुवेत हिँडेका महिलालाई अध्यागमनले पक्राउ गरेपछि विभाग र मानव तस्करबीचको मिलमतो बाहिर आएको हो। विभिन्न म्यानपावर कम्पनी तथा व्यक्तिमार्फत कुवेत हिँडेका महिला फरक–फरक जिल्लाका स्थायी बासिन्दा हुन्।

सरकारले कुवेतमा घरेलु कामदार पठाउन प्रतिवन्ध गरेपछि मानव तस्करले नक्कली संस्थागत भिषाका आधारमा श्रम स्वीकृति लिएर घरेलु कामदारमा महिला पठाउन थालेका हुन्। यसमा विमानस्थल प्रहरीको समेत सहयोग हुनसक्ने आशंकामा अनुसन्धान भइ रहेको छ।

विमानस्थलमा रहेको अध्यागमन कार्यालयले शंका लागेर सोधपुछ गर्दा सबैजनालाई मानव तस्करको समूहले घरेलु कामदारका लागि कुवेत पठाउन लागेको खुलेको थियो।

‘नक्कली भिषा सहित पक्राउ परेपछि थप अनुसन्धानका लागि विभागमा पठाएका थियौं, थप अनुसन्धान र कारवाही भै रहेको होला,’ विमानस्थल अध्यागमन कार्यालयका प्रमुख होमनाथ थपलियाले नेपालखबरसँग भने। उनका अनुसार अध्यागमन ऐनअनुसार नक्कली भिषा बरामद भएपछि १० जना महिला उपर अनुसन्धान र कारवाहीका लागि विभाग पठाइएको हो।

फ्लाई दुबईको विमानबाट संयुक्त अरब इमिरेट्स प्रस्थान गर्न लाग्दा उनीहरु पक्राउ परेका हुन्। विभागले प्रारम्भिक अनुसन्धानपछि वैदेशिक रोजगार विभागसहित अन्य निकायको समेत संलग्नताको आशंकामा घटनाको थप अनुसन्धानका लागि प्रहरीमा पठाउने तयारी गरिरहेको छ। घटनामा संलग्न म्यानपावर सञ्चालक र व्यक्ति पक्राउ गरेर अनुसन्धान अघि बढाउन विभागले प्रहरीमा खबर गरेको छ।

अध्यागमन विभागले मकवानपुरकी हरिमाया मोक्तान, उदयपुरकी नानु सार्की, रसुवाकी टीकामाया तामाङ, कपिलवस्तुकी शान्ता सुनुवार, चितवनकी कुमारी स्याङ्तान, रोल्पाकी हस्तकुमारी पुन, सिन्धुलीकी जानुकाकुमारी स्याङ्तान, मकवानपुरकी फूलमाया ब्लोन, मोरङकी पवित्रा विक र सिन्धुपाल्चोककी विष्णुमाया लामालाई नियन्त्रणमा लिएर अनुसन्धान गरिरहेको हो।