नेकपाले निर्णय गरेपछि कांग्रेसले प्रदेश राजधानी बारे के गर्ला?

हेटौँडा – नेकपाको निर्णय कुरेर बसिरहेको नेपाली कांग्रेसलाई राजधानीको विषयमा कुरा टुङ्ग्याउन हम्मेहम्मे परिरहेको छ। नेपाली कांग्रेसका संसदीय दलका नेता इन्द्र बहादुर वानियाँले नेकपाको निर्णय प्रक्रिया गलत भएता पनि निर्णय स्वागत योग्य रहेको बताइका छन्।

प्रदेश-३ नेपाली कांग्रेस संसदीय दलको बैठक हेटौंडाको भर्खर सुरु भएको छ। प्रमुख प्रतिपक्षी दलका नेता इन्द्रबहादुर बानियाँको अध्यक्षमा बसिरहेको बैठकले प्रदेश-३ को राजधानी र यसको नामकरणको विषयमा के गर्ने भन्नेबारे शुक्रबार रातिसम्म अन्तिम निर्णय गर्नेछ। तत्कालीन प्रधानमन्त्री शेरबहादुर देउवा र उपप्रधानमन्त्री तथा ऊर्जामन्त्री कमल थापाको समयमा अस्थायी राजधानी तोक्ने क्रममा प्रदेश-३ को राजधानी हेटौँडा तोकिएकोले कांग्रेसका १२ भन्दा बढी सांसद हेटौंडाको पक्षमा रहेको एक सांसदले बताए।

कांग्रेसभित्र भक्तपुर, काभ्रे र नुवाकोटको लागि पनि आवाज उठिरहेको छ। हेटौँडालाई स्थायी राजधानी र यसको नामकरणको निम्ति बारम्बार नेपाली कांग्रेसका तर्फबाट नेता बानियाँले संसद र बाहिरसमेत दबाब दिँदै आएका छन्। नेता बानियाँलाई आफ्नै सांसदले ह्पि जारी नगर्न संसदबाट नै आग्रह गरिरहेका छन्।  प्रदेश-३ मा नेपाली कांग्रेसको २२ मत छ।