धनुषा टिपर काण्ड- युवकको मृत्युपछि स्थिति तनावग्रस्त

धनुषा-अवैध खोला उत्खननको विरोध गर्ने युवकको टिपरले किचेर हत्या गरिएको घटनाले धनुषाको मिथिला नगरपालिका ५ स्थित श्रीपुरको अवस्था तनावग्रस्त बनेको छ।

बिहानैदेखि भइरहेको प्रदर्शनले अवस्था तनावग्रस्त बन्दै गएपछि अवस्था नियन्त्रण गर्न प्रहरीले लाठी चार्ज गर्दै एक दर्जनभन्दा बढी आश्रुग्यास प्रहार गरिसकेको छ। अहिले सो क्षेत्रमा व्यापक रुपमा प्रहरी परिचालन गरिएको छ।

घटना पश्चात स्थानीयले विरोध जनाउंदै पूर्व पश्चिम राजमार्ग विहानैदेखि अवरुद्ध गरेका छन्। दोषीमाथि कारवाहीको माग गर्दै घटना स्थल नजिकै मिथिला नगरपालिका ५ श्रीपुरको रामलक्ष्मण चोकमा स्थानीयहरुले टायर बालेर राजमार्ग अवरुद्ध गर्दै विरोध प्रदर्शन गरिरहेका छ्न।

बिहान करीब १० बजेदेखि प्रदर्शनको क्रममा ढुंगामुढा कार्य जारी रहेको छ भने प्रहरीले लाठी चार्ज र आश्रुग्यास प्रहार गर्दै आएका छन्। यो समाचार तयार पार्दा सम्म मानवीय क्षतिको जानकारी आउन सकेको छैन।

शुक्रवार बिहानै मिथिला नगरपालिका ५ श्रीपुर स्थित औरही खोलामा अवैध रुपमा बालुवा गिट्टी उत्खन्न गरिरहंदा विरोधमा उत्रेका स्थानीय युवक २४ वर्षिय ओमप्रकाश भन्ने दिलिप कुमार महतोको टिपरले किचेर हत्या गरिएको घटनाले अवस्था तनावग्रस्त बनेको हो।

बिहान ४ बजे आफ्ना साथी रोशन यादवसंग मर्निंग वाकमा निस्केका ओमप्रकाशले अवैध रुपमा बालुवा गिट्टी उत्खनन गरिरहेका ना ७ ख नम्बरको टिपरलाई रोक्न जाँदा टिपर चालकले उनको टाउकोमा टिपर चलाएर हत्या गरेको आरोप लगाइएको छ।