एमसीसी र सभामुख छान्न नेकपालाई सकस, शीर्ष नेताको छुट्टै भेला

काठमाडौं – सत्तारूढ नेपाल कम्युनिस्ट पार्टी (नेकपा) मा प्रमुख मुद्दामा सहमति जुटाउन सकस परिरहेकै बेला बहुमत सचिवालय सदस्यहरूले छुट्टै भेला गरेका छन् । नेकपामा सभामुख उम्मेदवार, अमेरिकाको मिलिनियम च्यालेन्ज कर्पोरेसन (एमसीसी) सम्झौतालगायत मुद्दामा किचलो भए पनि शीर्ष नेताहरूको छुट्टै भेलाले झन् समस्या बढाएको छ ।

नेकपा अध्यक्ष पुष्पकमल दाहाल, वरिष्ठ नेताद्वय झलनाथ खनाल र माधवकुमार नेपाल, सचिवालय सदस्य वामदेव गौतम, सचिवालय सदस्य एवं प्रवक्ता नारायणकाजी श्रेष्ठ, स्थायी कमिटी सदस्य भीम रावलले छुट्टै भेला गरेका हुन् ।

नेकपा सचिवालयका एक सदस्यका अनुसार सभामुखको उम्मेदवार, एमसीसी सम्झौताबारे अहिले पार्टीले कुनै निर्णय गर्न नसकेको बेला गौतम निवासमा बुधबार भएको छुट्टैै छलफललाई अर्थपूर्ण रूपमा लिइएको छ ।

प्र्रमुख प्रतिपक्षी नेपाली कांग्रेसमा देखिएको गुटगत किचलो नेकपामा पनि देखिएको बताउँदै उनले समस्याको समाधानभन्दा समस्या झन् बल्झाउने काम भइरहेको बताए । बैठकमा छलफल गर्नुको साटो छुट्टैै बैठक गरेर अगाडि बढ्दा पार्टीलाई नै नोक्सान पुग्ने निष्कर्ष ती सदस्यको छ ।

नेकपाभित्र सभामुखको उम्मेदवार र एमसीसी सम्झौतालाई लिएर तीव्र विवाद छ । प्रधानमन्त्रीसमेत रहेका नेकपा अध्यक्ष केपी शर्मा ओली र अर्का अध्यक्ष दाहालबीच यी विषयमा सहमति जुट्न सकेको छैन ।

राजधानी दैनिकका अनुसार, ओली र दाहालबीच पटक–पटक छलफल भए पनि कुनै टुंगो लाग्न नसक्दा झन् समस्या बढ्दै गएको छ । मुख्य विषयमा देखिएको समस्या समाधानका लागि छलफलमा नेताहरू जुटेको बताइएको छ । तर, समस्या समाधानभन्दा बल्झाउने काम भइरहेको बुझाइ अर्का थरी नेताको छ ।

नेकपामा नौ सदस्यीय सचिवालय छ । तर, गौतम निवासमा भएको छलफलमा ओली, सचिवालय सदस्य एवं उपप्रधान तथा रक्षामन्त्री ईश्वर पोखरेल र महासचिव विष्णु पौडेल सहभागी भएनन् । सचिवालय सदस्यसमेत रहेका गृहमन्त्री रामबहादुर थापा चीन भ्रमणमा छन् ।

गौतम निवासमा भएको बैठकमा सचिवालयका बहुमत सदस्य सहभागी थिए । नौमध्ये पाँच जना सचिवालय सदस्य सहभागी थिए । स्थायी कमिटीबाट रावल मात्रै सहभागी थिए । ओली समूहबाहेकका नेताहरूको छुट्टैै बैठकले प्रधानमन्त्री सशंकित भएका छन् ।

नेकपा स्रोतका अनुसार तत्कालीन माओवादी केन्द्रबाट सभामुख भएका कृष्णबहादुर महरा यौनकाण्डमा मुछिएपछि रिक्त सो पदमा तत्कालीन माओवादीकै नेता हुनुपर्ने दाहालको प्रस्ताव ओलीले अस्वीकार गरेपछि सहमति खोज्न छुट्टैै बैठक बसेको बुझिएको छ ।

तर, एमसीसी सम्झौता महराकै कारण संसद्बाट पारित नभएकाले रिक्त सभामुख पदमा तत्कालीन एमालेका नेता हुनुपर्ने अडानमा प्रधानमन्त्री ओली छन् । अर्को तर्फ ओली निकटका नेता एमसीसी सम्झौता संसद्बाट पारित हुनुपर्ने र दाहाल निकटका नेता पारित नगर्ने पक्षमा छन् । वरिष्ठ नेता नेपाल पक्षका नेताले एमसीसी सम्झौताको विरोध गर्दै आएका छन् । उनीहरूले सम्झौताको सर्तमा परिमार्जनसहित पारित हुनुपर्ने मत व्यक्त गरेका छन् ।

हालै सम्पन्न नेकपाको सचिवालय बैठकमा समेत एमसीसी सम्झौताको विषयमा विवाद भएपछि निर्णय गर्ने जिम्मेवारी सचिवालयलाई दिइएको थियो । तर, शीर्ष नेताकै बीचमा सहमति जुट्न नसक्दा सचिवालय बैठकमा समेत एमसीसी सम्झौता र सभामुख उम्मेदवारबारे निर्णय भएको छैन ।